Love Yourself

selfie photo 🤳
we post them on social media or let our friends see them because we think ourselves look good/nice or pretty/handsome or ... bla bla bla ...
that means we have some confidence to show off... & that confidence comes from self-love & thinking of ourself in positive ways... (my philosophy 😅)
'love urself' 😍🥰

အရင်တုန်းက ကိုယ့်အတွေးအခေါ်တွေက နည်းနည်းရှေးရိုးဆန်တယ် ခေါ်မလား... သူများတွေ selfie ပုံ တင်တဲ့အခါ သိပ်သဘောမကျဘူး... ၂၀၁၄/၂၀၁၅ လောက်မှာ ကိုယ်လည်း selfie ပုံ ရိုက်ဖြစ်လာတယ်/FB တို့ ဘာတို့မှာ တင်ဖြစ်တယ်... (အဲ့ဒီမတိုင်ခင်တုန်းကတော့ selfie တခါတလေ ရိုက်ပေမယ့် ပုံတွေတင်လေ့မရှိဘူး) နောက်ပြီး အဲ့ဒီလို ပုံတင်ရတာကိုလည်း enjoy ဖြစ်လာတယ်... သူငယ်ချင်းတွေက ကောမန့်တို့၊ လိုက်ခ်တို့ ပေးရင်လည်း သဘောကျတတ်လာတယ်... အဲ့တော့ အရင်တုန်းက selfie ရိုက်ပြီး ပုံတင်တာကို သဘောမကျတဲ့ ကိုယ့်ကိုယ်ကိုယ် နဲ့ selfie ရိုက်ပြီး ပုံတင်တတ်လာတဲ့ ကိုယ့်ကိုယ်ကိုယ်ကို ယှဥ်ကြည့်ဖြစ်မိတယ်... တွေးလည်းတွေးဖြစ်မိလာတယ်... အခုနောက်ပိုင်းနှစ်တွေမှာတော့ ကိုယ်က selfie ပုံတွေ ရိုက်ပေမယ့် FB မှာ သိပ်မတင်ဖြစ်ဘူး... ဘာလို့ဆို ကိုယ့်အကောင့်ထဲမှာ မိဘဆွေမျိုးဆရာသမားတွေရှိတဲ့အတွက် generation gap ပေါ့နော်... အမြင်မတူတာလေးတွေ၊ အမြင်မတော်တာလေးတွေ ဖြစ်မှာစိုးလို့ သိပ်မတင်ဖြစ်တာပါ... (လူကြီးတွေမရှိတဲ့ ကိုယ့်ရဲ့ instagram မှာပဲ တင်တယ် 😅 ) တခြားသူတွေက ဘာမှမပြောပေမယ့် (ကိုယ်တောင် သူများပုံတွေမကြိုက်သေးတာ ကိုယ့်ပုံလည်း မကြိုက်တာရှိမှာပေါ့ 😁) ကိုယ့်မိဘကတော့ တခါတလေ ကိုယ်တင်တာတွေကို သဘောမကျတဲ့အခါ ဝေဖန်အပြစ်ပြောတာမျိုး မဟုတ်ပေမယ့် 'ဘာတွေတင်မှန်းလဲ မသိဘူး'ဆိုတာမျိုးလေး ပြောတတ်တယ်... အဲ့ဒီအခါ ဘာလို့ပြောတာလဲလို့ တွေးမိသလို ကိုယ်က လူကြီးဆိုတော့ကာ ကိုယ့်မိဘတွေကို (အထူးသဖြင့် ကိုယ့်အမေကိုပေါ့) ကိုယ့်အတွေးအမြင်တွေကို လက်ချာပြန်ရိုက်ရတယ်... 😆

ကိုယ် စိတ်အရမ်းညစ်တဲ့အခါ ကိုယ့်ရုပ်ကိုယ် မှန်ထဲကြည့်ပြီး ရုပ်ဆိုးလိုက်တာလို့ထင်တယ်... ကိုယ် စိတ်ကြည်နေတဲ့အချိန်မျိုးဆို ငါ ရုပ်သိပ်မဆိုးပါဘူးလို့ ထင်တယ်... (တခါတလေလည်း ကြည့်ကောင်းပါတယ်၊ ရုပ်မဆိုးပါဘူးလို့ မာန်တက်တာပေါ့နော် 🤪 ဒါကတော့ လူတော်တော်များများ ဖြစ်တတ်ကြတာမို့ ကိုယ်တယောက်တည်း ဟုတ်မယ်မထင်ပါဘူးလေ 😜 ) တခုခုကို ဝမ်းနည်းတာမျိုးဆိုလည်း ကိုယ့်ကိုယ်ကိုယ် သနားစရာလို့ မြင်တတ်ပြန်တယ်... အဲ့တော့ကာ ရုပ်ဆိုးတယ်လို့ ကိုယ့်ကိုယ်ကိုယ် မြင်တဲ့သူတွေက ကိုယ့်ကိုယ်ကိုယ်တောင် အကောင်းမြင်စိတ်မွေးဖို့ အားနည်းကြတဲ့သူတွေလို့ ထင်ပါတယ်... လူတိုင်းက ကိုယ့်ကိုယ်ကိုယ်ရုပ်ဆိုးတယ်လို့ ယေဘူယျအားဖြင့် လက်ခံထားရင်တောင် တခါတလေမှာ ကိုယ့်ကိုယ်ကိုယ်သဘောကျတဲ့စိတ်လေးတော့ ဖြစ်မိတတ်ကြပါသေးတယ်... ကိုယ့်ကိုယ်ကိုယ်တောင် အကောင်းမြင်စိတ်မရှိတဲ့သူတွေဟာ ကိုယ့်ပတ်ဝန်းကျင်ကိုလည်း အကောင်းမြင်စိတ်နည်းမယ်လို့ ထင်ပါတယ်... ပြီးတော့ လူအများစုက ကိုယ်လှတဲ့ပုံကိုပဲ သူများကို ပြချင်မှာပေါ့နော်... သားရေကျပြီး ဖြစ်ကတက်ဆန်း အိပ်ပျော်နေတဲ့ပုံမျိုးတို့ ဗိုက်ပူသွားခေါနေတာမျိုးတို့ကိုတော့ ဘယ်ပြချင်မလဲ နော့... (funny photo တင်တတ်ကြတဲ့ လူတချို့ကလွဲရင်ပေါ့) အထူးသဖြင့် အမျိုးသမီးတွေဆို ဓာတ်ပုံရိုက်တဲ့အခါ လှချင်လို့ အသက်ကလေးအောင့် ဗိုက်ကလေးချပ်ထားတာမျိုးတောင် လုပ်တတ်ကြသေးတာလေ နော်... 😅 (ဝ,နေရင် ပြန်ရိုက်ပေးတို့ဘာတို့လေ... ကိုယ်လုပ်နေကျတွေ 🤣) အဲ့တော့ကာ လှချင်တဲ့သူတွေဟာ၊ ကိုယ့်ကိုယ့်ကိုယ် ကြည့်ကောင်းပါတယ်၊ မဆိုးပါဘူးလို့ မြင်တဲ့သူတွေဟာ ကိုယ့်ကိုယ်ကိုယ် ချစ်တတ်တဲ့သူတွေ၊ ကိုယ့်ကိုယ်ကိုယ် ချစ်ဖို့သတိရသေးတဲ့သူတွေလို့ ထင်ပါတယ်...

နောက်တခုက selfie ပုံတွေဟာ စကားလုံးတွေနဲ့မဟုတ်ဘဲ ဓာတ်ပုံလေးတွေနဲ့ ကိုယ့်ပတ်ဝန်းကျင်ကလူတွေကို စကားပြောချင်ကြတာလို့လည်း ထင်ပါတယ်... လူတိုင်းက အချစ်ခံချင်ကြပါတယ်... ဂရုစိုက်ခံချင်ကြပါတယ်... ဘယ်သူကမှ ကိုယ့်ပုံကိုယ်တင်ပြီး အဆဲတောင်းတဲ့သူမျိုးတော့ ရှိမှာမဟုတ်ပါဘူး... ချစ်ခင်ဖွယ်ရာစကားတွေကိုသော်လည်းကောင်း၊ အားပေးစကားသော်လည်းကောင်း ကောင်းမွန်သော တခုခုကို မျှော်လင့်တာမျိုး ရှိလိမ့်မယ်လို့ ထင်ပါတယ်... ဒါမှမဟုတ်လည်း ကိုယ်လှတယ်ထင်တဲ့ အရာလေးတခုကို တယောက်ယောက်က သဘောတူထောက်ခံတာမျိုးကိုလည်း မျှော်လင့်တောင့်တတာမျိုးလည်း ဖြစ်ကောင်းဖြစ်နိုင်ပါတယ်... အဲ့တော့ အမြင်မရိုင်းတဲ့ selfie ပုံတွေကို စကားပြောသော ဓာတ်ပုံများအဖြစ် ကိုယ်တိုင်မြင်မိသလို ကိုယ်နဲ့လက်လှမ်းမီတဲ့ (ကိုယ့်မိဘ 😅) ကိုလည်း အဲလိုလေး မြင်စေချင်မိတယ်...

ကိုယ်ဆို ကိုယ်တိုင်ရိုက်တဲ့ ကိုယ့်ပုံတွေကို ပိုသဘောကျတယ်... သူများရိုက်ပေးရင် မနေတတ်သလို ရှိုးတိုးရှန်းတန်းဖြစ်တာတို့ ရယ်တာသည်ရယ်တာနဲ့မတူဘဲ သွားဖြဲတဲ့ပုံဖြစ်နေတာတို့ အမြဲဖြစ်တတ်လို့ စိတ်တိုင်းမကျတတ်ဘူး... ကိုယ့်ကိုယ်ကိုယ်ရိုက်တဲ့အခါကျ ရှက်စရာလည်းမလိုဘူးလေ ပဲလည်းပေးချင်သလိုပေးလို့ရတော့ ပိုလည်းအသက်ဝင်တယ် ထင်တာပဲ... ဓာတ်ပုံဆိုတာ ရိုက်ပေးတဲ့သူထက် အရိုက်ခံရတဲ့ ကာယကံရှင်က ပိုကြိုက်ဖို့၊ သဘောကျဖို့၊ နှစ်သက်ဖို့ လိုပါတယ်... အဲ့တော့ ကိုယ့်ပုံကို ကိုယ်မြင်တဲ့ကိုယ့်အမြင်ကသာ ပိုအဓိကကျတယ်လို့ ထင်ပါတယ်...

နောက် လွန်ခဲ့တဲ့ နှစ်ပေါင်းများစွာက ကိုယ်ကြည့်ဖူးတဲ့ ဇာတ်ကားနာမည်လည်းမမှတ်မိသလို ဇာတ်လမ်းလည်း မမှတ်မိတဲ့ ဂျပန်ကားလေးတစ်ခုရှိတယ်... မင်းသမီးလေးက photographer... ကင်ဆာရောဂါနဲ့ မဆုံးခင်မှာ လှနေသေးတဲ့ သူ့ပုံသူကို ဓာတ်ပုံရိုက်ပြီး သူဆုံးသွားတဲ့အခါမှာ black & white ကိုယ်တပိုင်းပုံ အကြီးကြီးကို ထားသွားခဲ့တယ်... နောက် လွန်ခဲ့တဲ့ တလလောက်က ကြည့်ဖြစ်တဲ့ more than friends ဆိုတဲ့ ကိုရီးယားကားထဲမှာလည်း မင်းသားက photographer... သူ့ပုံသူ portrait ရိုက်ပြီး သူ့ဓာတ်ပုံပြပွဲမှာ သူ့ပုံကိုလည်း ချိတ်ထားတယ်... အင်တာဗျူးဖြေတဲ့အခါမှာလည်း သူ့ကိုယ်သူ ချစ်တတ်လာလို့ သူပုံကို သူရိုက်တာပါလို့ ဖြေတယ်... အဲ့ဒီရုပ်ရှင်လေးတွေထဲက အဲ့ဒီဇာတ်ကွက်လေးတွေက ကိုယ့်အတွေး၊ ကိုယ့်အမြင်တွေကို လွှမ်းမိုးနေတယ်... ကိုယ့်ကိုယ်ကိုယ်ချစ်မှ ကိုယ့်ကိုယ်ကိုယ်လည်း အကောင်းမြင်ပြီး လှတယ်၊ ကြည့်ကောင်းတယ်လို့ မြင်နိုင်မှာလို့လည်း ထင်တယ်... အဲ့ဒီလို ကိုယ့်ကိုယ်ကိုယ်ကြည့်ကောင်းတယ်လို့ မြင်နိုင်တဲ့သူတွေမှလည်း ကိုယ့်ကိုယ်ကိုယ် selfie ရိုက်နိုင်ကြတာလို့ ထင်ပါတယ်...

လူဆိုတာ ကိုယ့်ကိုယ်ကိုယ်ထက် ဘယ်သူ့ကိုမှ ပိုမချစ်နိုင်ပါဘူး... ငါ့မိဘ၊ ငါ့ခင်ပွန်း၊ ငါ့သားသမီးဆိုတာမှာလည်း 'ငါ'ဆိုတဲ့ အတ္တလေးပါနေလို့ပါ... ဘယ်သူကမှလည်း ကိုယ့်ကိုယ်ကိုယ်ထက် ပိုနားလည်နိုင်မှာ မဟုတ်သလို၊ ဂရုစိုက်နိုင်မှာ မဟုတ်ပါဘူး... ကိုယ့်ကိုယ်ကိုယ် ချစ်တတ်ဖို့၊ တန်ဖိုးထားတတ်ဖို့ သိပ်ကို လိုအပ်ပါတယ်...



နိဂုံးချုပ်ရရင် ကိုယ့်ကိုယ်ကိုယ်ချစ်တဲ့သူတွေ၊ ချစ်ဖို့ ကြိုးစားနေကြသူတွေကသာ ကိုယ့်ကိုယ်ကိုယ် အကောင်းမြင်ပြီး selfie ရိုက်နိုင်ကြတယ်လို့ ထင်ပါတယ်... ကိုယ့်ကိုယ်ကိုယ် အကောင်းမြင်ဖို့ ကြိုးစားနေသူတွေမို့ သူတို့၊ကိုယ်တို့ ပြောချင်နေတဲ့၊ တခုခုကို တောင်းဆိုနေတဲ့ selfie ဓာတ်ပုံလေးတွေကိုလည်း မြင်တတ်အောင် ခံစားပေးလိုက်ကြရင်ဖြင့်..... ☺️


Created By: k2tmaung (18 January 2021 Monday 01:56AM)