မိျဖဴ
"ဒါ ဘာလဲ"
အမေ့လက်ထဲက ကျမ ဒိုင်ယာရီ... ကျူရှင်မှ ပြန်လာတဲ့ကျမ အမောတောင် မဖြေနိုင်ခင် မေးခံလိုက်ရတဲ့ မေးခွန်းကြောင့် သူခိုးလူမိသလို မလှုပ်မယှက် ဒိုင်ယာရီစာအုပ်ကို စူးစိုက်လို့ ရင်ထဲမှာတော့ "အပြစ်"ဆိုတဲ့ လှံက လာစိုက်နေခဲ့တယ်... ဘာပဲဖြစ်ဖြစ် အမေဆိုတဲ့ နာမတစ်ခုကို ကြောက်လန့်မိတာကတော့ သားသမီးတစ်ယောက်မို့ မဟန့်တားနိုင်ပါ... ရင်ထဲမှာ မြင်းတွေ ဒုန်းစိုင်း ရိုင်းစိုင်းစွာ ပြေးနေကြတယ်ထင်ပါရဲ့... သို့ပေမယ့် အပြင်ပန်းမှာတော့ မတုန်မလှုပ် ကြောက်ရွံ့တဲ့ရုပ်ကို ဟန်လုပ် အမေ့ဒေါသကို အန်တုဖို့ အင်အားတွေ စုမိတယ်...
"ကြည့်စမ်း စာအုပ်ထဲမှာ ရေးထားလိုက်တာတွေ... နင် ငါ့သမီးမဟုတ်ဘူး..."
အမေက မျက်ရည်တွေနဲ့ နာနာကျင်ကျင် အော်ပြောလိုက်တာကို ခေါင်းမော့ခံလိုက်ပေမယ့် အဲ့လိုရဲဆေးတင်နိုင်ဖို့ သက်ပြင်းတစ်ချက်ကို တိုးတိုးတိတ်တိတ် လက်သိပ်ထိုး ချ,လိုက်မိတယ်... အမေဆူတဲ့ နေ့တွေတိုင်း မကျေနပ်တာတွေ တစ်လုံးမကျန် အာခံလို့ ရေးမှတ်ခဲ့တဲ့ ကျမရဲ့ သက်သေခံစာအုပ်... လက်ပူးလက်ကြပ် ချုပ်ပြီးနှောင်ပြီး မျက်စိရှေ့ရောက်နေတာမို့ "ကိုယ်လုပ်ကိုယ်ခံ" ဆိုတဲ့ မဖြစ်ညစ်ကြယ် အရွယ်ငယ်ငယ်နဲ့ သူရဲကောင်းစိတ် မွေးချင်မိတယ်...