သုည

အမေက "တစ်"ပေါင်းလိုက်...
အဖေက "တစ်"ပေါင်းလိုက်နဲ့...
ငါ့ကိုယ်ငါ အပေါင်း"တစ်ရာ"ဆိုပြီး...
ကောင်းလှပြီ အထင်နဲ့ မာန်တက်...
အထင်ကြီးမှု ချောက်ကြီးထဲ...
အခေါက်ခေါက် ခုန်ချလို့ ငါ့ဘဝက လှမှလှပေါ့...

လောကကြီးထဲ အဖေမကူ အမေမကူနဲ့...
ကိုယ့်ခြေကိုယ်သုံး ရုံးကန်ကြည့်မှ...
ဟိုလူက "တစ်"နှုတ်လိုက်...
ဒီလူက "နှစ်"နှုတ်လိုက်နဲ့...
ဘဝက ခြစ်ခြုပ်ကုပ်ပဲ့နေလိုက်တာ...
ဒါတောင် "ငါဟဲ့.."လို့ အစွယ်က မကျိုးနိုင်သေး...
ဘေးလှည့်လို့ ရန်စောင်...
မာန်ထောင်ကောင်းနေတုန်း...

တစ်နေ့ကမှ မှန်ထုတ်ကြည့်တယ်...
အို... ငါဟာ သုည...
ခုမှ အစ... ရှိပါသေးလား...
ဆေးဆိုတာ ခါးမှ အနာကျက်သလို...
သင်ခန်းစာတွေက ခါးမှ...
ဘဝက အထာကျသတဲ့...

ကဲ... သုည...
ရှေ့ဆက် က,လို့...
အပေါင်းတွေရှာစု...
လောကဒဏ်ကို အံတုဦးစို့...

Created By: k2tmaung (19 December 2011 Monday 05:27PM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

နေရာအလွှဲအပြောင်း...

ဒီနေ့... ကျမ တစ်ယောက်တည်း ဆုံးဖြတ်ချက်ချတယ်... ကျမ နေရာကို တစ်ခြားတစ်ယောက်ကို လွှဲပြောင်းပေးလိုက်တော့ဖို့အတွက်... အဲ့ဒီအတွက် အလွှဲအပြောင်း ရှင်းတမ်းလေးတစ်ခုတော့ ရှိသင့်တာပေါ့...

ချစ်သူရဲ့ချစ်သူ...

ဘယ်တုန်းကမှ သင့်အပေါ် မေတ္တာမပျက်၊ မမုန်းခဲ့ပါ... ငါ ချစ်သလို သင်လည်း သူ့ကို ချစ်မှာပါပဲ...
အဲ့ဒီနေရာ ငါ လည်း နေခဲ့ဖူးလို့ ငါ လည်း နားလည်တယ်... ခံစားပေးလို့ ရတယ်...
တစ်ခုတော့ ရှိတယ်... ငါက ငါ့ကိုယ်ငါ သူငယ်ချင်းလို့ ခေါင်းစဉ်တပ်ပြီး ရှေ့က တစ်ယောက်ဆီ ငါ ပြန်တွန်းပို့ပေးဖို့ ကြိုးစားခဲ့တာ...
သင့်ကို ငါ မသိဘူး... ရှေ့က တစ်ယောက်ကိုလည်း ငါ မသိခဲ့ဘူး... (ရှေ့တစ်ယောက်ကို မသိဘူးဆိုတာထက် ငါ အမှတ်မထားမိလိုက်မိဘူးဆို ပိုမှန်မယ်...)
ဒါပေမယ့် ဇာတ်သိမ်းခန်း ရောက်ကာနီးမှ သိလိုက်ရတာချင်းကတော့ တူတူပါပဲ...
ရှေ့တစ်ယောက်ဆီက ငါ မလုခဲ့သလို ငါ့နေရာကိုလည်း ငါ အလုမခံနိုင်တာ သဘာဝတော့ ကျ,မယ်ထင်ပါရဲ့...
နှစ်ယောက် တစ်ယောက်မို့ ငါ ဒီပွဲက တရားဝင် ထွက်ပါတယ်... ဘက်မညီတဲ့ ငါတို့ ပွဲမှာ ငါ့ကိုယ်ငါ ထပ်မရှုံးချင်ဘူး...
ငါ မကြားဖူးတဲ့ စကားလုံးတွေ... သူ့ဆီက ထွက်လာကတည်းက ငါ ရိပ်မိခဲ့ပါတယ်... ဒါပေမယ့် ငါတို့က ဝေးကွာနေဆဲလေ...
ငါ... ဒီဇင်ဘာနှင်းထုကို အရမ်းမျှော်လင့်ခဲ့တာ... ငါတို့နှစ်ယောက် ရန်ပွဲတွေ မျက်နှာချင်းဆိုင် ဆွေးနွေးဖြေရှင်းပြီး ချစ်ကြည်ရေးရဖို့ကို...
ထင်မထားလိုက်မိဘူး... သင် က လက်ဦးသွားလိမ့်မယ်လို့..

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

အမျိုးသားရေးလား... တရုတ်ဗမာအရေးအခင်းလား...

တစ်ခါလာလည်း လက်ညှိုးထိုး... နောက်တစ်ခါလာလည်း အကြောင်းအရာသာ ပြောင်းသွားတယ်... ဒီလက်ညှိုးပဲ ထိုးထိုးနေကြတယ်... ဖတ်ရတာများတော့ အချဉ်ကပေါက်လာပြီ...

ဖတ်မိသမျှစာတွေ လိုက်ပြီး comment ရေးရရင်လည်း ကျီးမဲကြား ကျီးဖြူ သွားရန်စတယ် ဖြစ်ဦးမယ်... အဲ့တော့ ကိုယ့်ဝေါ်ပေါ်မှာပဲ public လုပ်ပြီး ကိုယ့်ဘာသာ ရေးတယ်...

_ _ _ _ _ _ _ _ _ _ _ _ _ _ _ _ _ _ _ _ _

တစ်ဖက်စောင်းနင်းသိပ်ဆန်တဲ့ စာဖြစ်စေဦးတော့ ရေးထားတဲ့ ဘာသာစကားကို ဖတ်တတ်သူတိုင်း နာတတ်ကြတာ၊ နာပြတတ်တာ အမျိုးသားရေးတော့ မဟုတ်ဘူး ထင်ပါရဲ့...

မြန်မာပြည်မှာ တရုတ်တွေ မှတ်ပုံတင်ရတာ မနာလိုတာလား... ကန့်ကွက်ချင်တာလား.... မြန်မာတွေကော တစ်ခြားတိုင်းပြည်မှာ နိုင်ငံသားခံသွားကြတာ ဘယ်လောက်များပြီလဲ... ရွာကနေမြို့ပြောင်း၊ ဒီမြို့ကနေ ဟိုမြို့ပြောင်း၊ ဒီတိုင်းပြည်က ဟိုတိုင်းပြည်ပြောင်းနဲ့ အဆင်သင့်ရာ နေထိုင်ကြတာ အဆင်ပြေသူရှိသလို မပြေတာတွေလည်း အများကြီး... ဘယ်လူမျိုးက ကောင်းပြီး ဘယ်လူမျိုးက မကောင်းဘူးလို့ လက်ညှိုးထိုးတာ ဝါးလုံးရှည်နဲ့ စဉ်းစားဉာဏ်မဲ့ပြီး လိုက်ရမ်းနေတာနဲ့တူတယ်...
ဟိုလူမျိုးမကောင်းဘူး၊ ဒီလူမျိုးမကောင်းဘူးနဲ့... ပြောနေတဲ့သူတွေ... မြန်မာတိုင်းကကော ကောင်းလို့လား... ပြည်သူတွေ ခဏခဏဆဲတဲ့ တို့တိုင်းပြည်က ဗိုက်ကားကားနဲ့လူတွေက တရုတ်တွေလား၊ ကုလားတွေလား၊ ဘိုတွေလား...
လူမျိုးနဲ့မဆိုင်ဘူး၊ ဘာသာနဲ့မဆိုင်ဘူး... ကောင်းတဲ့သူက ကောင်းပြီး မကောင်းတဲ့သူက မကောင်းဘူးပဲ... ဗုဒ္ဓဘုရားက ကုလားမျိုးနွယ်က လာတာဖြစ်ပြီး ရေရှုကကော မြန်မာဟုတ်လို့လား...
လူမျိုးတူသူချင်း ဘာသာတူသူချင်း အကြောင်းသင့်စေချင်တာ လူမျိုးတိုင်း၊ ဘာသာတိုင်းပဲ... ရေစက်ပါလို့ လူမျိုးမတူတာ၊ ဘာသာမတူတာနဲ့ အကြောင်းသင့်ဦးတော့ အဲ့ဒါ အပြစ်မှ မဟုတ်တာ...
တိုင်းပြည်အရေး အားတက်သရောရှိတဲ့ ဗိုလ်ချုပ်မြေးကရော မြန်မာစစ်စစ် ဟုတ်လို့လား...

တစ်ခုတော့ မေးချင်လေရဲ့...
လူမျိုး လူမျိုးဆိုပြီး သိပ်ခွဲခြားနေတဲ့ လူတွေကိုပေါ့... လူသားအစ အာဒံဧဝ လို့ ပြောပြောနေတတ်တာ... အဲ့ဒီ အာဒံနဲ့ဧဝက ဘာလူမျိုးပါလိမ့်... ကမ္ဘာအစ ဘယ်လူမျိုးက စ,ခဲ့တာပါလိမ့်...
တိုင်းပြည်ဆိုတာနဲ့ နယ်နိမိတ်စည်းသားထားလို့သာ ဘာနိုင်ငံ ညာနိုင်ငံနဲ့ အဲ့နိုင်ငံတွင်းမှာ ရှိတဲ့ လူမျိုးတွေကလည်း ဘာနိုင်ငံသား ညာနိုင်ငံသား ဖြစ်လာကြတာ...
သေချာခွဲခြမ်းကြည့်ပါဦး... ကချင် နဲ့ မြန်မာ၊ ရခိုင် နဲ့ မြန်မာ လူမျိုးတူလား... ဘာသာစကားတူလို့လား... ကိုယ့်တိုင်းပြည်မှာ ရှိတဲ့လူတွေမှ လူတွေလား... လူတိုင်း မျက်လုံးနှစ်လုံး၊ နှာခေါင်း နှစ်ပေါက်၊ ပါးစပ်တစ်ခုကို မျက်နှာပေါ် တင်ထားတာချင်းတူတူ ဟိုလူမျိုးမကောင်း၊ ဒီလူမျိုးမကောင်းနဲ့... လိုက်လိုက်ရမ်းနေတာ တော်တော့်ကို အာရုံက နောက်တယ်...

ချမ်းသာတိုင်း ထင်တိုင်းကျဲတဲ့သူရှိသလို ဆင်းရဲတဲ့သူတွေ မျက်စိစုံမှိတ်ပြီး မိုက်ကန်းတာတွေလည်း အပုံအပင်ပဲ...
ဘယ်နှယ့်... ကိုယ့်တိုင်းပြည် တစ်ခြားလူမျိုးတွေ ရောက်လာမှဘဲ မိန်းမတွေ ကျင်းတူးပြီး နေရတော့မလိုလို... သူများနိုင်ငံက လာတဲ့သူနဲ့ ကိုယ့်နိုင်ငံမှာ ရှိတဲ့သူ ဘယ်သူက ပိုများလဲ... လူနည်းစုကို လူများစုက တွေးပြီး ပူနေတာတော့ မဟုတ်သေးပါဘူး... အသိဉာဏ်မကြွယ်ဝဘူးလို့ထင်ရင် ကြွယ်ဝအောင် ဘယ်လိုလုပ်မလဲ... အသိတရား မတိုးတက်ဘူးထင်ရင် တိုးတက်အောင် ဘယ်လိုလုပ်ရမလဲ ဒါ အတွေးသင့်ဆုံး မဟုတ်ဘူးလား...
ပိုက်ဆံချမ်းသာတဲ့နိုင်ငံခြားသားတွေ ကိုယ့်နိုင်ငံလာလို့ ကိုယ့်လူမျိုးမိန်းကလေးတွေ ဒုက္ခရောက်ကြကြေးဆို ပိုက်ဆံချမ်းသာတဲ့နိုင်ငံမှာ သွားအလုပ်လုပ်နေကြတဲ့ တစ်နည်းအားဖြင့် လူအများစုရှိရာ တို့တိုင်းပြည်က မိန်းကလေးအနည်းစု သွားအလုပ်လုပ်ရင်ကော ဒုက္ခရောက်ရောလား...
ကိုယ့်နိုင်ငံမှာ ကိုယ့်လူမျိုးအများစုနဲ့နေပြီး လူနည်းစုလာတာကို အတွေးနဲ့ စာချဲ့လိုက်ကြတာ တစ်ထောင့်တစ်ညပုံပြင်တွေလိုပဲ ရေးတဲ့ဘာသာစကားကို နားလည်သူတိုင်းက ဖတ်ကောင်းတယ် မှတ်နေကြတာလည်း အံ့ဩလေရဲ့...

အဲ့ဒီလို... လက်ညှိုးထိုးတတ်ပြီး ထိုးတဲ့ လက်ညှိုးကို လက်မထောင်ပြကြတဲ့သူတွေကို ပြောချင်သေးရဲ့...
ဘယ်နားက ရေဝင်တယ် မရှာဘဲ သင်္ဘောဝမ်းဗိုက်ထဲ ရေဝင်ရင် လူတွေ ရေနစ်ပြီး ဘယ်လို သေကြ၊ ဒုက္ခရောက်ကြမလဲ ဖွဲ့နွဲ့နေရင်တော့ မကြာခင် ရေတွေ မြင်လာရတာ ဆန်းတယ်မခေါ်ဘူး... မိတ်ဆွေ...
လက်ညှိုးထိုးတာ လွယ်လွယ်လေးပါ... ထိုးရမယ့်သူကို တည့်တည့် ထိုးတတ်ဖို့ပဲ လိုလိမ့်မယ်...

တံခါး ဘယ်သူဖွင့်နေသလဲ သေချာမရှာဘဲ ငါ့အိမ်ပေါ် တက်လာတဲ့သူ ငါ့ရန်သူလို့ ထိုင်အော်နေလို့ကတော့ တစ်အိမ်လုံး ရှိတာ ကုန်မယ်လို့ပဲ မှတ်ပါ...
နောက်ကြော ဓားထိုးခံရဦးတော့ ဓားထိုးခံရတယ်ဆိုတဲ့ ခေါင်းစဉ်က အရေးမကြီးဘူး... ဓားဒဏ်ရာ ဘယ်လောက် နက်မနက်ဆိုတာပဲ အရေးကြီးတာ...
အဓိက နဲ့ သာမည ခွဲတတ်ရင်တော့ စာဖတ်ရသူတွေ ပိုတန်ဖိုး ရှိလိမ့်မယ်... စာရေးသူတွေရေ့...။

Created By: k2tmaung (05 October 2011 Wednesday 01:30PM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

ငါ (၂)

ငါလား
ဗူးဆို ဖရုံမသီးတတ်တဲ့...
ခပ်ထီးထီး အတွေးခေါင်ခေါင်နဲ့လူပေါ့...

ငါလား...
လူချစ်အောင် ပြုံးပြတတ်သလို...
သုံးစားမရအောင်လည်း မဲ့တတ်သေးတယ်...

ငါလား...
နှစ်ဆယ့်ရှစ်မျက်နှာစာ စာရွက်ပါးကို အဆုံးသတ်ရင်း...
မှတ်ခဲ့ဖူးတာတွေအတွက် လိပ်ပြာသန့်ရဲ့လား...
တည့်တည့်မေးခွန်း ထုတ်ကြည့်နေတယ်...

ငါလား...
တစ်ခါတစ်ခါတော့ ဝေဝါးဝါးပါပဲ...
ခပ်ခါးခါး ဘဝကော်ဖီထဲ...
သကြားထည့်ဖို့ ခပ်သဲ့သဲ့ အပြုံးနဲ့...
နှလုံးသွင်းနေရတယ်...

ငါလား...
ဟန်ဆောင်တတ်ဖို့ ကြိုးစားရင်း...
ရိုးသားမှုကို အထုတ်ထုတ်နေတယ်ဆိုလည်း...
ဟုတ်တယ်လို့ ဝန်ခံချင်တယ်...

ငါလား...
မနာလို ရန်တိုက် အမှိုက်ကားမဖြစ်အောင်...
ခြစ်ချုပ်ချွေတာ အကြွေလှဖို့...
ခပ်လှလှ ဝတ်စားတတ်သူ...

ငါလား...
တစ်ရက် ငိုဖြစ်ရင်...
နှစ်ရက် ရယ်တတ်အောင် ကြိုးစားသူ...

ငါလား...
ခေတ်ဆန်သူတွေထဲ နည်းနည်း ခြေလှမ်းကွာနေပေမယ့်...
ခွါမြင့်မြင့်နဲ့ တင့်နေချင်သေးတယ်...

ငါလား...
အဖြူရောင် လွယ်အိပ်ကို ထမ်းပိုးရင်း...
အချိုးအကွေ့တိုင်းမှာ...
ရိုင်းပင်းသူတွေနဲ့ တစ်ထောက်နားတယ်...

ငါလား...
ဟိုးဝေးဝေးကို လျှောက်ဖို့...
ရောက်နေတဲ့ နေရာမှာ...
ကြာကြာ ပြုံးရင်း...
ခပ်ရှင်းရှင်းနဲ့ လင်းအောင် ကြိုးစားရပ်နေတဲ့...
ခပ်သေးသေး အမှုန်အမွှားပါ...။

Created By: k2tmaung (27 September 2011 Tuesday 05:48AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

ဘဝထဲက အတွေးတစ်ချို့

ဘဝဆိုတာကို ခါးတယ်လို့ မြင်ရင်...
သင် ရယ်မောခြင်းကို အားနာသင့်တယ်...

တစ်ခါတစ်ခါ အထီးကျန်ဆန်လိမ့်မယ်...
နိမ့်ပါးတဲ့ အချိန်တိုင်း အသိဉာဏ်တစ်ခု...
စုမိတယ်ဆို အထီးကျန်ဆန်ခြင်းက...
သင့်အဆင်းကို လင်းဖို့ ရင်းနှီးမှုတွေ....

တစ်ခါတစ်ခါ ငိုကြွေးမိမယ်...
တွေးမိတတ်ရင် မျက်ရည်ဆိုတာ...
တိုတိုထွာထွာ အနာကျက်ဆေး...
အနက်ရောင်အတိတ်တစ်ချို့ကို ကန့်လန့်ကာချပေးတယ်...

တစ်ခါတစ်ခါ စိတ်ပျက်တတ်မယ်...
ခက်ခဲမှုတိုင်းက အောင်မြင်ဖို့မလွယ်...
ရယ်မောတတ်ရင် ရှုံးနိမ့်မှုဆိုတာ...
ငါ ဆိုတာအတွက် ခွန်အားတွေ ပေးလိမ့်မယ်...

တစ်ခါတစ်ခါ ဝမ်းနည်းနေမယ်...
ပြေရာပြေကြောင်းသာ ခေါင်းလောင်းထိုးတတ်ရင်...
နိုးကြားတဲ့ မနက်တိုင်းမှာ ငှက်လေးတွေတေးဆိုတတ်တယ်ဆိုတာ...
ဘေးလူမပြောဘဲ သင် တွေးရင်း ငေးမောတတ်လာလိမ့်မယ်...

ဘဝဆိုတာကို ခါးတယ်လို့ မြင်ရင်...
သင် ရယ်မောခြင်းကို အားနာသင့်တယ်...
ညဥ့်တိုင်းမှာ လမသာတတ်ပေမယ့်...
လသာတဲ့ညဥ့်တွေကိုလည်း သင် မေ့နေတတ်တယ်...။

Created By: k2tmaung (23 September 2011 Friday 11:05AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

ထိုသူများ...

လိုချင်တာ ရခဲ့တယ် ခေါ်မလား...
အနာခါးခါးနဲ့ ထိုသူတစ်ချို့တော့... 

မနှစ်မြို့လို့ ငြိုငြင်နေရော့မယ်... 

သူချစ်ကို ရခဲ့တဲ့ ငါ... 

သူ့ကို ချစ်တဲ့ ကြာပင်တစ်သိုက်... 

ရင်မှာ အပင်လာစိုက်နေကြတယ်... 

ငါ တစ်ခါ ငိုမိတိုင်း...

တွေးစရာအသိုင်းအဝိုင်းကြား......
လားပေါင်းများစွာနဲ့ နှမငယ်ငယ်...&
မုန်းမပြယ်လို့ နာကျင်နေကြရှာမလား... 

မသိချိန်မှာ ရစ်မူးခဲ့ရိုးမှန်ပေမယ့်... 

သိခဲ့ချိန်မှာ မပြစ်မှားခဲ့ရိုး အမှန်ပါ... 

လိပ်ပြာသန့်တိုင်းသာ...

တောင်ပံဆန့်နိုင်ရင်... 

ကလောင်ရှင်တို့ စုဝေးရာကြား... 

ငါ မြားစူးလို့ ရူးမိမယ်မထင်... 

မမှားခဲ့လို့ တောင်းပန်စကား... 

တစ်ဆင့်ကြားစေဖို့ မလိုဘူးထင်ပါရဲ့... 

သို့သော်ငြား... 

စိုနေဖူးမယ့် မျက်ဝန်းညိုညို... 

ခိုနေဖူးမယ့် အမုန်းသိုသို... 

ထိုထိုသော... 

ပတ်သက်ရာ ပတ်သက်ကြောင်း... 

ငါ့ကိုလည်း စိတ်ထောင်းစေခဲ့တယ်... 

'ဘက်'မဟုတ်ခဲ့တဲ့ တို့တွေကြား... 

'ဆက်'ရန်တွေ 'သက်'ဆင်းလို့... 

အမုန်းတွေ 'ပျက်'သုန်း... 

အရှုံးမဲ့စွာ အနာ'ကျက်'နိုင်ကြပါစေ...

Created By: k2tmaung (20 Sep 2011 Tuesday 01:53PM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

---

သွားစမ်းပါ...
ကြားရတဲ့ စကား...
နားခါးရအောင်...
လာလာ မကြွားစမ်းပါနဲ့...

နင့်အတွက် မရိုးပေမယ့်...
ငါ့အတွက် အဖြစ်ဆိုး...
အပြစ်တစ်မျိုးတိုးအောင် ...
နင် ဆူးချိုးပြီးပြီပဲ...

နင်လည်း ပြန်မဆုတ်...
ငါလည်း ရှင်းချက်မထုတ်တဲ့...
ဟိုနေ့ညက ဇာတ်ထုတ်လေး...
ဘယ်သူ့ကြောင့် မိုးချုပ်သွားတာပါလိမ့်...

ကိစ္စမရှိပါဘူး...
စ,ကတည်းက အရိပ်ကောင်းခဲ့သူမဟုတ်လို့...
ထိတ်လန့်ခံရတယ်ဆိုလည်း...
မိုးတိတ်နိုင်အောင်ပဲ ငါ ကြိုးစားလိုက်တော့မယ်...။

Created By: k2tmaung (29 May 2011 Sunday 12:51AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

မိန်းမကြမ်း

ဘဝက လမ်းများတာ အဆန်းလား...
အဟ... ငါလည်း ဒီနေ့ကစ မိန်းမကြမ်းပေါ့...
လန်းတယ်ထင်ရင် ပန်းတာလေးတွေ နည်းနည်းလျှော့...
ငါနဲ့အတူ မော့တာပေါ့...
မလန်းဘူးထင်ရင် မေတ္တာတွေ ခမ်းထားလိုက်...
...လုံးဝ လုံးဝ ဂရုမစိုက်...
ကြိုက်ချင်ကြိုက် မကြိုက်ချင် ပြိုင်မိုက်တာပေါ့... နော့...။

Created By: k2tmaung (27 May 2011 Friday 03:35AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

အချစ်...

အချစ်ဆိုတာ သာပေါင်းညာစား...
ဗိုက်မဝရင်လည်း အချစ်က ခါးတယ်...
စံနှုန်းတွေနဲ့ ဇကာချ...
ကျန်တာကိုတောင် အဆစ်ကလေးရ,မှ တဲ့..
ပေးနိုင်တုန်းခဏသာ ချိုမြိန်တာ...
ကြာကြာထားတော့ သွားကြားများ ညက်သလို...
ဟိုဟာဘဝင်မကျ ဒီဟာကြည့်မရ...
အချစ်ဆိုတာ ပါမုန့်ထောပတ်သုပ်လို...
ပါးပါးနဲ့ သကြားပါ,ပါမှ...
တော်ကာကျလေရဲ့..။

Created By: k2tmaung (27 May 2011 Friday 3:14AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

အိပ်စက်ခြင်း

အတုအယောင် အိပ်မက်တွေကြား...
ခါးသီးခြင်းတွေ မေ့...
ဒီတစ်နေ့တော့ အိပ်ရေးဝဝ အိပ်ပါရစေ...
ကျေးဇူးပြု၍ အစေးမကပ်တဲ့...
ဒီတစ်ရက်... လာမနှိုးရက်ကြပါစေနဲ့...။

Created By: k2tmaung (24 May 2011 Tuesday 12:51AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

မာန... တန်ဖိုး...

ပန်းဆိုတာ ညှိုးနွမ်းပြီးရင်...
ပြန်လန်းရိုး ထုံးစံ မရှိပါဘူး... ။
မပန်ချင်နေပါ...
တန်ဖိုးမဲ့အောင်တော့ မဖဲ့ချွေပါနဲ့... ။
မစာနာရင်နေပါ...
မာနကျိုးအောင်တော့ ဆူးမချိုးပါနဲ့... ။

Created By: k2tmaung (24 May 2011 Tuesday 12:24AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

သူ နှင့် ပန်းရိုင်း

မင်းက ပန်းအကြောင်း နှံ့စပ်သူ...
ငါက ပန်းရိုင်းတစ်ကောင်...
"မင်း နဲ့ ငါ မိတ်ဆွေဖွဲ့ရအောင်"တဲ့ ...
ကန့်လန့်ကာဖွင့်စမှာတော့...
ရယ်သံတွေ ပျော်မြူး ပန်းတွေ ပွင့်ဖူးခဲ့ပါတယ်...

ဘယ်လိုပဲ မင်း သင်သင်...
ငါက ပန်းရိုင်းတစ်ကောင်ရဲ့ ဇာတိကို...
မဝှက်တတ်ခဲ့ဘူး...
ပတ်သက်မှုအပေါ် စိတ်ပျက်တာ...
တကယ်တော့ မင်းလည်း မမှားခဲ့ပါဘူး...

"ဝေးကွာမှု"က သွေးထိုး...
"နားလည်မှု"က မယဉ်ပါး...
ကြာတော့...
အတွေးကိုယ်စီနဲ့ ထင်ရာမြင်ရာ စစ်ခင်း...
ရင်းတည်ခဲ့တဲ့ "နာကျည်းမှု"တွေ...
နင်းခြေခဲ့တဲ့ "နှလုံးသား"တွေ...
ကြားတရားခံကတော့... "မာန်မာန"တွေပေါ့...

မကြေလည်မှုတွေကြား...
စကားလုံးတစ်စုနဲ့ မင်း စ,ပြီး စစ်ပြင်ခဲ့တယ်...
နောက်ဆက်တွဲ စစ်ထိုးသူကတော့ ငါ ပန်းရိုင်းပေါ့...
အရှုံးအနိုင် မကွဲပြားခင်...
ငါ့မာနကို နန်းချ...
နန်းကျ သံယောဇဉ်နဲ့...
ငါက စ,လို့ ချစ်ကြည်ရေး သံတမန်ခင်းခဲ့တယ်...
"အမုန်း"တံခါး မင်း တားထားပြီးမှတော့..
ငါတို့တွေ...
ကိုယ့်လမ်းကိုယ်လျှောက်...
တပ်မခေါက်ကြေးပေါ့...

နှစ်ယောက်လုံး စစ်ပန်းမှာ ကြောက်သူ...
နောက်လူကို ညှာတာကြသူတွေမို့...
တို့တွေ ခပ်တန်းတန်းနဲ့...
လမ်းတွေ့ရင်လည်း မခေါ်ကြေးပေါ့...

ကြိုးတွေ အထပ်ထပ်...
ရစ်ပတ်ခဲ့သူချင်းမို့...
အလွမ်းတွေ ထုတ်ပိုး...
မြတ်နိုးခဲ့ကြသူချင်းမို့...
မပြောမခေါ် မမြင်မတွေ့...
လက်တွေ့မှာ ကျင့်သားမကျတဲ့...
ရက်သတ္တပတ် များစွာအလယ်...
အထာညက်သေးမှာ မဟုတ်ပေမယ့်...
ကြာရင်တော့ သွေးအေးသွားမှာပါ...

မင်းအပေါ် ထားခဲ့တဲ့ သစ္စာ...
မင်း စွတ်စွဲသလို မဟုတ်ခဲ့တဲ့ ငါ့မေတ္တာ...
တကယ် မှန်ရိုးမှန်ရင်...
ဘဝမှာ ဘယ်"သူ"ကိုမှ ထပ်မကြုံပါရစေနဲ့သား...။

Created By: k2tmaung (25 April 2011 Monday 10:37AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

ပန်း

ပန်းကလေးတွေဟာ...
အရှုစားခံလား...
အသုံးတော်ခံလား...
သို့မဟုတ်...
မြင်သူ ရင်အေး...
ရနံ့ချို ကျွေး...
တေးမဆိုဘဲ ချွေးသိမ့်တတ်သူလား...

ရနံ့သင်းတဲ့ ပန်း...
နမ်းရှိုက်လွယ်ကြတယ်...
အဆင်းလှနဲ့ ပွင့်ဖူး...
ခူးချိုးခံရတယ်...
ထုံသင်းအလှ မကြွယ်ဝတော့...
ပန်းချင်းတူမှာ ဂုဏ်ငယ်ရပြန်တယ်...
ပန်းကလေးတွေရဲ့ အလှ နဲ့ ဘဝ...
ခံစားခြင်း နဲ့ စံစားခြင်းဖြင့် မြေခကြတယ်...

နမ်းရှိုက်ပြီးတဲ့ ရနံ့...
သင်းပျံ့တန်ဖိုး မြတ်နိုးတတ်ရင်...
ခူးချိုးပြီးတဲ့ အဆင်း...
လှပခြင်းဂုဏ်အင် အသင် ချစ်တတ်ရင်...
အခြွေစောလည်း ကြွေရကျိုးနပ်ပါတယ်...။

Created By: k2tmaung (14 April 2011 Thursday 12:03PM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

လျှို့ဝှက်ချက်လေးတွေ ရှိခဲ့တယ်...

ဖိနပ်လေးက ရွှေရောင်လေး... ကျမ ကြိုက်တဲ့ ဖိနပ်ပုံမျိုးလေး မဟုတ်ပေမယ့် သူပေးတဲ့ ပထမဆုံး မွေးနေ့လက်ဆောင်လေးလေ...
"ဖိနပ်လေးက သေးနေတာလား... ကြိုက်ကောကြိုက်ရဲ့လား..."
ကျမစီးထားတဲ့ သုံးလက်မခွဲဒေါက်မြင့်ဖိနပ်ကြီးကို ချွတ်ပြီး လက်မဝက်လောက်ပဲမြင့်တဲ့ ရွှေရောင်ဖိနပ်လေးကို စီးကြည့်လိုက်တယ်... နည်းနည်းလေး မဆိုသလောက်လေး သေးနေတယ်...
"တော်လားဟင်... အဲ့ဒီဖိနပ်လေးကလေ တစ်ရံပဲ ရှိတော့တာ... မတော်ရင် သွားလဲလို့ရတယ် သိလား... ဆိုင်ကို မနည်းတောင်းတောင်းပန်ပန်နဲ့ ပြောခဲ့တာ... ကျနော့ကောင်မလေးကို မွေးနေ့လက်ဆောင်ပေးချင်လို့ပါလို့... မတော်ရင် ပြန်လာလဲပါရစေလို့... ဟွန်း... ခင်ဗျားလေးကြောင့်နော်... မိန်းမအုပ်ထဲသွားပြီး ယောက်ျားလေးတစ်ယောက်တည်း ပထမဆုံးအကြိမ် ဖိနပ်သွားဝယ်လာခဲ့တာ... ဟွန်း..."
ကျမ ပြုံးမိသွားတယ်... မတော်ဘူးလို့ ပြောလိုက်ရင် ကောင်းမလား... ဖိနပ်လေးကို စီးပြီး ဟိုဘက်ဒီဘက် ဘယ်ပြန်ညာပြန်ကြည့်ရင်း...
ရှိပါစေတော့... တစ်ရံတည်းပဲ ကျန်တော့တဲ့ ဖိနပ်... ပြန်လဲလိုက်ရင် သူရွေးပေးတာမဟုတ်ဘဲ ငါ ကြိုက်တာ ရွေးတယ်ဖြစ်သွားမှာပေါ့... ပြီးတော့ ပျော်ရွှင်နေတဲ့သူမျက်နှာ...
ကျမ သူ့ကို အပြုံးရွှင်ဆုံး ရယ်ပြလိုက်တယ်...
"တော်လိုက်တာ... ကွက်တိပဲ... ကြိုက်တယ် သိလား..."
"တကယ်လား... ဝမ်းသာလိုက်တာ... ကိုယ်က မတော်မှာ စိုးနေတာ... တကယ်လည်း ကြိုက်တယ်နော်..."
"အင်း... ကြိုက်တယ်..."
"ဒါဆို ဒီနေ့ဒီဖိနပ်လေး စီးနော်..."
အမ်... ခက်ပြီ...
"ဟွန်း... ဝတ်စုံက အမည်းရောင်ကြီးနဲ့ လိုက်လည်းမလိုက်ဘဲနဲ့... ပြီးတော့ ရည်းစားပေးထားတဲ့ ပထမဆုံး မွေးနေ့လက်ဆောင်လေး... မစီးရက်ပါဘူး..."
သူ မျက်နှာတော့ နည်းနည်းညိုသွားတယ်...
"ကိုယ်က စီးစေချင်လို့ တကူးတက သွားဝယ်လာတဲ့ဟာ... ပြီးတော့ k2 ခြေလှမ်းတိုင်းကို ကိုယ်က ဆူးမထိခလုပ်မငြိစေချင်တာ..."
ကျမ စိတ်အိုက်သွားတယ်... သူက စီးစေချင်တာမှန်ပေမယ့် ဖိနပ်လေးက နည်းနည်းလေး သေးနေတာရယ်... ပြန်လဲရင် ဒီဖိနပ်နဲ့ တစ်ပုံစံတည်း ပြန်မရမှာကိုလည်း စိုးတယ်...
ကျမ သူ့လက်မောင်းကို သိုင်းဖက်လိုက်ရင်း...
"နောက်တော့ စီးမယ်လေ... ခုတော့ စီးရမှာ နှမြောတယ်... သိမ်းထားဦးမယ်နော်... နော်..."
ကျမကို မျက်စောင်းလှမ်းရွယ်ရင်း...
"အင်းပါ... သဘောပါ..."
ကျမ သူ့လက်မောင်းကို တင်းတင်းဖက်တွယ်လိုက်ရင်း...
"စီးမှာပေါ့... ခုတော့ စီးရမှာ နှမြောလို့ပါ..."
ကျမ ဖိနပ်ဗူးလေးထဲ ဖိနပ်ကို ပြန်ထည့်ရင်း သူ့ကို မျက်လုံးတွေ မှိတ်သွားတဲ့အထိ ရယ်ပြလိုက်တယ်...
(ဒါ သူမသိခဲ့တဲ့ လျှို့ဝှက်ချက်လေး တစ်ခုပေါ့...)

မနေ့ညက သူနဲ့ online မှာ စကားများခဲ့သေးတယ်... စိတ်က စိုးတုန်း... သူ့သူငယ်ချင်းက မကြာခင် ပြန်တော့မှာဆိုတော့ သူ လိုချင်တဲ့ လက်ဆောင်က ဒီနေ့မှ ဝယ်မထည့်ပေးရင် အဆင်မပြေတော့...
ဟွန်း... ဘာဝယ်ပေးရမှန်းလဲ ခုထိ စဉ်းစားမရ... ပထမဆုံး ကျမတို့ရဲ့ ချစ်သူများနေ့အတွက် စိတ်စိုးရင်းကနေ ဘာလက်ဆောင်ဝယ်ပေးရကောင်းမလဲ တွေးနေမိတယ်...
ရှပ်အင်္ကျီ ဝယ်ပေးရင် ကောင်းမလား... သူက ရှပ်အင်္ကျီတွေနဲ့ လိုက်တယ်...
အင်း... Thumb Drive (Memory Stick) ဝယ်ပေးရင် ကောင်းမလား... သူက အလုပ်ပြီးရင်း အလုပ်ဆိုတော့...
တောင်နဲ့မြောက်မှာရှိတဲ့ ဆိုင်နှစ်ဆိုင်ကြား... ရှေ့ကို ငါးလှမ်းလောက် လျှောက်လိုက်... နောက်ကို ငါးလှမ်းလောက် ပြန်လှည့်လျှောက်လိုက်နဲ့... ဝေခွဲမရဖြစ်နေခဲ့တယ်...
--- သူက သူ့အလုပ်ကို အမြဲပထမ ဦးစားပေးဆိုတော့ Thumb Drive က ပို အသုံးဝင်မှာပဲ---
ပြီးတော့ ဓားလေးလို အပိတ်အဖွင့်လုပ်လို့ရတဲ့ ကျမ Thumb Drive လေးကို "ဒါမျိုး ဒီမှာ မရှိဘူးနော်"လို့ ဆိုပြီး သူ အရမ်းသဘောကျ,ခဲ့တာလည်း မြင်ယောင်မိပြန်တယ်...
စိတ်ဆုံးဖြတ်လိုက်ပြီး Thumb Drive လေးရှိနိုင်မယ့် နေရာကို အရောက်သွားခဲ့တယ်... ဟော... သိပ်မရှာလိုက်ရပါဘူး... ကျမ လိုချင်နေခဲ့တဲ့ Thumb Drive လေး...
အွန်... $99.90... ဈေးကြီးလိုက်တာ...
ကျောင်းတက်နေတဲ့ ကျမအတွက်... Part-Time အလုပ်လည်း မရှိသေးတဲ့ ကျမအတွက် အစစအရာရာက ဈေးကြီးနေတယ် ထင်ပါရဲ့...
8GB ပဲ ဝယ်ရင် ကောင်းမလား... နည်းနည်း ဈေးသက်သာတယ်ဆိုပေမယ့် 16GB ကတော့ ပိုတန်တယ်...
8GB နဲ့ 16GB ကို တစ်ဖက်စီကိုင်ရင်း ဟိုဟာယူရကောင်းနိုးနိုး... ဒီဟာယူရကောင်းနိုးနိုး...
နောက်ဆုံးတော့ သက်ပြင်းတစ်ခုကို မှုတ်ထုတ်လိုက်ရင်း... ငါနဲ့ တစ်ပုံစံတည်းဖြစ်အောင် 16GB ပဲ ယူမယ်ဟာ... ညစာ ဥပုသ်စောင့်လိုက်ရင်တော့ အဆင်ပြေမှာပါလေ...
ကျမ တစ်ချက်ပြုံးလိုက်ရင်း 8GB လေးကို တန်းမှာ ပြန်ချိတ်လိုက်ရင်း အောင်မြင်စွာ ကျောခိုင်း ထွက်ခွာလာခဲ့တော့တယ်...
(ဒါလည်း သူမသိခဲ့တဲ့ လျှို့ဝှက်ချက်လေး တစ်ခုပေါ့...)

သူ့မွေးနေ့ ရောက်တော့မယ်...
လူကြုံကလည်းရှိတော့...
ကျမ ဝမ်းသာအားရ Formal Suit တွေ ရောင်းတဲ့ G2000 ဆိုင်ကို သွားခဲ့တယ်... သူ့အတွက် ရှပ်အင်္ကျီလေး ဝယ်ပေးဖို့အတွက်ပေါ့...
2nd Item ဝယ်ရင် 50%ဆိုပါလား...
ဒါလေးတွေကတော့ နည်းနည်းဈေးပေါတယ်... တစ်ထည် $30 ကျော်ဆိုတော့ မဆိုးဘူးပေါ့...
ဒါပေမယ့် ကိုယ်တိုင်ကလည်း အကောင်းကြိုက်တတ်တဲ့သူဆိုတော့......
ဒါလေးက အဖြူပေါ်မှာ ပန်းခရမ်းရောင်အဆင်းလေးတွေ... သဘောအကျဆုံးပဲ... ဟိုက် $69 ဆိုပါလား... ဈေးကလည်း ကြီးလိုက်တာ...
နှစ်ထည်ဝယ်ရင် ဒုတိယတစ်ထည်က 50% ဆိုတော့..... ဆိုတော့...
ဒါလေးကတော့ အဖြူပေါ်မှာ အဖြူဆင်းလေးတွေနဲ့... အွန်... $59 ကြီးများတောင်...
ငါ့နှယ်... ငါ့အတွက် ဘာမဆို ဈေးကြီးနေပါရောလား... အရင်ကဆိုရင် တန်တယ်ဟ... ဆိုပြီး ဝယ်လိုက်မယ့်အမျိုး... ခုကျမှ ဆင်းရဲနေလိုက်တာ...
နှစ်ထည် ဝယ်ရင် ကောင်းမလား... တစ်ထည်ပဲ ဝယ်ရင် ကောင်းမလား... #$@!^#^*@&*
နှစ်ထည်လုံးပဲ ဝယ်မယ်ကွာ...
အမ်... Size တွေကလည်း အမျိုးမျိုးပဲ... ငါ သိတာက သူက Large Size ဝတ်တာ... ဒီမှာက Large တောင် အမျိုးမျိုး...
ကောင်တာက ကောင်လေးနဲ့ကောင်မလေးကို သွားမေးရင်း ဘယ် Size ယူရကောင်းနိုးနိုးနဲ့ပေါ့...
နောက်ဆုံးတော့ စိတ်မှန်းနဲ့ ရွေးခဲ့လိုက်တယ်... (ရွေးခဲ့တဲ့ Size တော်တယ်ဆိုတဲ့အခါ အတိုင်းမသိ ဝမ်းသာခဲ့ရတယ်...)
အင်း... နှစ်ထည်ဖိုးဆိုတော့... ကျောင်းအတန်းချိန်တွေ ဖျက်ပြီး အလုပ်လုပ်ပြန်လုပ်ရင် နောက်လ ငါ့ စာမေးပွဲကြေး အကြွေးလေး ပြန်ဆပ်နိုင်ကောင်းပါရဲ့...
(ဒါလည်း သူမသိခဲ့တဲ့ လျှို့ဝှက်ချက်လေး တစ်ခုပေါ့...)

"ဟယ်လို... Star Hub က... ဘာကိစ္စရှိလို့ပါလဲ...
ဟုတ်ကဲ့... အဲ့ဒီ ဖုန်းနံပါတ်ကို ခေါ်ခဲ့ပါတယ်..."
ဟင်... စိတ်ထဲမှာတော့ အသံအကျယ်ကြီးပေါ့... ဘယ်လောက်မှလည်း မပြောလိုက်ရဘဲနဲ့ $200 ကျော်ကျ,တယ်...
ဘုရား... ဘုရား...
"ဟုတ်ပါတယ်... နိုင်ငံ ကုဒ်မရှိတော့ တိုက်ရိုက်ပဲ ခေါ်လို့ရလို့ပါ... တစ်ခြားဈေးသက်သာမယ့် နည်းလမ်းများ မရှိဘူးလား..."
စိတ်ထဲ လေးသွားလိုက်တာ... နင်သွားလိုက်တာ... ရေတစ်ဖန်ခွက်လုံး သောက်တာတောင် အမောမပြေပါလားနော်...

သူ စိတ်စိုးသွားပြီ... မတတ်နိုင်ဘူးလေ... ငါကလည်း ငါပဲ... စိတ်စိုးနိုင်မှန်း စိတ်မကောင်းဖြစ်နိုင်မှန်းသိရက်နဲ့ ပြောမိတာကိုး...
ဖုန်းခက ဈေးကြီးပါတယ်ဆိုမှ...
ဘယ်တတ်နိုင်မလဲလေ... သူ့ထက် အရေးကြီးတာ ဘာမှမှ မရှိတာ... ညစာလေး ဥပုသ်စောင့်... အတန်းလေးဖြတ်ပြီး အလုပ်လုပ်... စာမေးပွဲနီးရင် ခွင့်ရက်နည်းယူ... ဒါပဲ ရှိတာပေါ့လေ...
ဖုန်းပြောနေရင်းနဲ့တော့ ဖုန်းဖိုးတွေ စိတ်တွက်နဲ့ တွက်နေခဲ့တာကိုတော့ သူ မသိပါဘူးလေ...
တစ်လအတွင်း စုစုပေါင်း ဖုန်းဖိုး $600 ကျော်...
(ဒါလည်း သူမသိခဲ့တဲ့ လျှို့ဝှက်ချက်လေး တစ်ခုပေါ့...)


ဆက်ရန်... To be continued... :)))))

Created By: k2tmaung (13 February 2011 Sunday 05:01AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

ရင်တွင်းစစ်

ငါ့ကိုယ်ငါ ဟောမယ့်တရား...

အစမှာတင် ဘာသာခြား ဖြစ်ဖြစ်သွားတယ်...

ငါ့စိတ်တွေကို အတောင်နှုတ်...

အခန်းထဲ ချောင်ပိတ်...

ငါ့ခြေထောက်တွေ ငါ ထိပ်တုံးခတ်မိတာကိုက...

ခေါင်းစဉ်နဲ့ စာကိုယ်လွဲနေခဲ့တာ...

ငါက သူ့ကို လှောင်အိမ်ထဲ ထည့်ထားသတဲ့လား...

ဒါဆို သူ မှင်နီတားထားတဲ့ ငါ့အပြုအမူတွေကကော...

ငါ့အတွက် ဘောင်တစ်ခုဖြစ်နေခဲ့တာ...

သတိတောင် ထားမိရဲ့လား...

နိုးတဲ့အချိန်တိုင်း မျှော်ခဲ့ရတဲ့ ငါ...

ကြာလာတော့ မောတယ်...

ငါ မခေါ်တဲ့ရက် သူ ပျော်နေရင်...

မျှော်မိတဲ့ ငါ့ကိုယ်ငါ သရော်ချင်တယ်...

မာနဆိုတာကို နင် ကိုးကွယ်ပေမယ့်... 

အတွယ်အတာတွေနဲ့ ငါကတော့ တိမ်ဖုံးနေခဲ့တာ...

နင် ပြောခဲ့တဲ့ နင့်ပျက်ကွက်မှုတွေ...

ဘာတွေနဲ့ ငါ့ကို ကွက်လပ်ဖြည့်ပေးခဲ့ဖူးလဲ...

နင် အမြဲပြောတဲ့ နင် ပေးထားတဲ့ သစ္စာ...

ငါ့ဘက်ကလည်း အမှတ်တစ်ရာကို ဒဿမတောင် မလျော့ခဲ့ဖူးပါဘူး...

တစ်ခါတစ်ခါတော့ ငါ့ ယုံကြည်မှုတွေ ခိုင်မာဖို့...

အရေခြုံထားတဲ့ စကားလုံးတစ်ချို့...

လိုအပ်တယ်လို့ကော နင် မထင်ဘူးလား...

တစ်ရက်မှာ ၂၄နာရီအလုပ်များနေတဲ့ နင်...

ငါ့စာမျက်နှာက လွဲလို့...

သာကြောင်းမာကြောင်း နင် အမြဲ နွှဲတတ်ပါတယ်...

ရေတွေကျဲလာတဲ့ ဆက်ဆံရေး...

ချစ်ကြည်ရေးဆိုတဲ့ ဆိုင်းပုဒ်တစ်ခုနဲ့တော့ မလုံလောက်ဘူးလေ...

ထားလိုက်ပါ...

သံယောဇဉ်နည်းတတ်တယ်လို့...

ကိုယ့်ကိုယ်ကိုယ် သိပ်အထင်ကြီးတဲ့ ငါ...

အကျ,နာတာ ဖြစ်မှာပါ...

သိပ်ပြတ်သားတတ်တယ်လို့... 

မာန်တက်ခဲ့တဲ့ငါ...

အရှိုက်ထိတယ်ဆိုတာ ဒါမျိုးထင်ပါရဲ့...

နင်ရာ ငါရော ကြိုသိပါတယ်...

ငါတို့ကြား အားမနာတမ်း ရှင်းတမ်းဖွင့်ဖို့...

ရင်နဲ့ရင်းရမယ့် အချိန်တစ်ခု လိုအပ်နေတယ်ဆိုတာ...

နင်ရော ငါရော မပြောဘဲသိပါတယ်...

ငါတို့ အခေါ်အပြောကျဲခဲ့တာ...

ငါ့ဘက်က ခြေလှမ်းတွေ စ,ချဲခဲ့တာ မဟုတ်ဘူးဆိုတာ...

နင့်ပင်ပန်းမှုတွေ ငါ ရေလောင်းသလို...

ငါ့နာကျင်မှုတွေကိုလည်း နင် အဆိပ်ခပ်ခဲ့တယ်...

ညီမျှခြင်းချ အချိုးကတော့ မလှဘူးပေါ့...

နှစ်ယောက်လုံးက မာနတွေနဲ့ တည်ကိန်းတွေကို...

စားနေကြတာကိုး...

အားလုံးခြုံတော့...

ငါ့မာနနဲ့ ငါ့နှလုံးသား...

စစ်တိုက်တမ်း ကစားနေခဲ့တာ...

ခုထိတော့ အနိုင်ရသူ နာကျင်နေရဆဲပေါ့...။

Created By: k2tmaung (22 January 2011 Saturday 03:53AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

တမ်းချင်း

စာမရေးတာကြာလို့ တွေးမိတွေးရာ စာစုတစ်ခုအနေဖြင့်သာ ရေးပါသည်...။

အချစ်တစ်ခုလို့တော့ အမည်မတပ်ချင်ပါဘူး... အမည်လည်း မတပ်လိုပါဘူး... စိတ်ကစားမှုတစ်ခုလို့လည်း ပေါ့ပေါ့တိမ်တိမ် မသတ်မှတ်ချင်ပြန်ဘူး... ဘာလို့ဆို နက်နဲတဲ့ ခံစားမှု တစ်ခုတော့ ဖြစ်ခဲ့ဖူးလို့ပါပဲ...

ငယ်ငယ်ကတည်းက အတန်းထဲမှာ ရန်ဖြစ်ပြီလားဆိုရင် ယောက်ျားလေးတွေနဲ့မှလို့ နာမည်ထွက်ခဲ့တဲ့ ကျမ... ယောက်ျားလေးတွေကို တော်တော်လေး အမြင်ကပ်ခဲ့ဖူးပါတယ်... ယောက်ျားတွေနဲ့ပတ်သက်ပြီးလည်း မာနကြီးတယ်လို့ သတင်းလွေလွေရှိခဲ့ဖူးတယ်... အထက်တန်းကျောင်းပြီးတဲ့အထိလည်း ယောက်ျားလေးသူငယ်ချင်းရယ်လို့ ဟုတ်တိပတ်တိမရှိခဲ့ဖူးဘဲ ယောက်ျားလေးဆို ဘုကန့်လန့်ပြောပြီး ဘုကြည့်ကြည့်ဖို့ပဲ စိတ်ကူးခဲ့တဲ့ထဲမှာ ကျမလည်း တစ်ယောက်အပါအဝင်ဖြစ်ခဲ့တယ်...

သို့သော်... သူက ယောက်ျားလေးတစ်ယောက်ဖြစ်ပေမယ့် ချွင်းချက်တော့ ဖြစ်ခဲ့တယ်... ကျမတို့ချင်း မရင်းနှီးပါဘူး... စကားသေချာ မပြောခဲ့ဖူးပါဘူး... ဒါပေမယ့် ကျမဘာသာကျမ သတ်မှတ်ထားတဲ့ အမှတ်တရများစွာတော့ ရှိခဲ့ဖူးပါတယ်...

ကျမ သူ့ကို အတန်းထဲမှာ မကြာမကြာ ခိုးငေးဖူးတယ်... ခိုးကြည့်ဖူးတယ်... သူ့အကြောင်းတွေဆို နားစွင့်ခဲ့ဖူးတယ်... ဒါပေမယ့် ကျမ သူ့ကို မပိုင်ဆိုင်ချင်ခဲ့ဘူး... ကျမ ခံစားချက်တွေကို အတည်မဖြစ်စေချင်ခဲ့ဖူးဘူး... ဒီအတိုင်းလေးပဲ ခံစားမှု တစ်ခုအနေနဲ့ ရှိနေစေချင်ခဲ့တယ်... သူလည်း သိကောင်းသိနိုင်သလို သိချင်မှလည်း သိလိမ့်မယ်... သူလည်း ကျမလို ခံစားချက်မျိုးရှိကောင်းရှိမယ်... ရှိချင်မှလည်း ရှိလိမ့်မယ်... သေချာတာက ကျောင်းတစ်ကျောင်းရဲ့ အတော်ဆုံးကျောင်းသားကျောင်းသူများသာနေတဲ့ အတန်းမှာ သို့မဟုတ် မာနတွေ တစ်မျိုးမဟုတ်တစ်မျိုး ခေါင်ခိုက်နေတဲ့ အတန်းမှာ ဘယ်ကျောင်းသားကျောင်းသူကမှ ခံစားချက်တွေကို ရှေ့တန်းမတင်တတ်ကြသလို အထက်တန်းကျောင်းသားကျောင်းသူဆိုတဲ့ အရွယ်တွေကို မသိစိတ်တွေက စိုးမိုးထားလို့လည်း ဖြစ်ကောင်းဖြစ်မှာပါ...

သူ့မိဘနဲ့ ကျမမိဘတွေ သိကျွမ်းကြတာက ကျမ သူ့ကို စိတ်ဝင်စားမှုတွေ ဖြစ်စေခဲ့တဲ့ အကြောင်းရင်းအစ ထင်ပါရဲ့... ဒါကတော့ လိုရာဆွဲတွေးတာလည်း ဖြစ်နိုင်ပါတယ်... မိဘတွေချင်း သိကြ ရင်းနှီးကြတဲ့ ကျမတို့အတန်းထဲက ယောက်ျားလေးတော်တော်များများရှိခဲ့ဖူးပေမယ့် ကျမ သတိတရရှိမနေခဲ့ဖူးဘူး... ဥပမာ... ကျမမိခင်နဲ့ အရမ်းရင်းနှီးတဲ့ အန်တီတစ်ယောက် ကျမကို တွေ့တိုင်း ချွေးမတော်ချင်တယ်လို့ ကျမမိခင်ကို အမြဲပြောလေ့ရှိတဲ့ အဲ့ဒီအန်တီရဲ့သားကလည်း ကျမတို့နဲ့ တစ်တန်းတည်းပါပဲ... ဒါပေမယ့် အဲ့ဒီကောင်လေးကိုကျ တော်တော်နဲ့ကို မသိခဲ့သလို နည်းနည်းမှလည်း စိတ်ဝင်စားလို့ မရခဲ့ပါလား... ထူးတော့ထူးဆန်းသားလား...

အတန်းထဲမှာ "သူ" ရှိမှန်း ကျမတို့ စာသင်နှစ်တစ်နှစ်ကုန်လို့ နောက်တစ်နှစ်ရောက်တဲ့အထိ ကျမ သတိမထားခဲ့မိဘူး... မိဘချင်းရင်းနှီးရာကနေ ကျမမိခင်ဆီက သူ့နာမည်ကို ပထမဆုံး ကြားခဲ့ဖူးတယ်... နောက်တော့ သူ့ကို သတိထားမိသွားတယ်... သူလည်း ကျမလိုပဲ သူ့မိခင်ကတစ်ဆင့် ကျမအကြောင်းတွေ ကြားရဖူးမယ်ထင်ပါတယ်... အဲ့ဒီကစလို့ပေါ့... သူနဲ့ ကျမ တစ်ယောက်ကိုတစ်ယောက် မျက်မှန်းတန်းမိသွားတယ်...သူက သားသုံးယောက်မှာ အကြီးဆုံး... နေ့လည် မုန့်စားဆင်းချိန်ဆို သူ့ညီလေးက အတန်းထဲကို အမြဲလိုလို လာတတ်တယ်... တစ်ခါတစ်လေ သူ့ညီလေးကို ပခုံးဖက်ပြီး အတန်းထဲက ထွက်သွားတတ်သလို တစ်ခါတစ်လေလည်း အတန်းထဲမှာ စကားတွေ ပြောနေတတ်တယ်... ကျမလည်း မသိမသာ စပ်စုမိသလို ကျမမောင်လေး အတန်းထဲလာရင်လည်း သူက မသိမသာ စပ်စုတတ်တယ်...
နောက် ကျမ သူ့ကို ပိုပြီး သတိထားမိသွားတာက... ကျမတို့အထက်တန်းကျောင်းနဲ့ မလှမ်းမကမ်းမှာ အလယ်တန်းကျောင်းတစ်ကျောင်းရှိခဲ့တယ်... ကျမငယ်ငယ်ကတက်ခဲ့တဲ့ကျောင်းဖြစ်သလို အဲ့ဒီကျောင်းရှေ့က အရိပ်ကောင်းကောင်းရတဲ့ စွယ်တော်ပင်ကြီးကလည်း ကျမနဲ့ အကျွမ်းတဝင်ရှိလှတယ်... ကျမတို့ ကျောင်းဆင်းချိန်ဆို အမြဲလိုလို သူ့ကို အဲ့ဒီသစ်ပင်ကြီးအောက်မှာ တွေ့ရတာတတ်တယ်... ကျမတို့တွေက အိမ်ပြန်ရင်ပဲဖြစ်ဖြစ် ကျူရှင်သွားရင်ပဲဖြစ်ဖြစ် အဲ့ဒီအလယ်တန်းကျောင်းနဲ့ အဲ့ဒီသစ်ပင်ကြီးကြားကနေဖြတ်ပြီး အမြဲသွားရတယ်... အမြဲမြင်တွေ့နေရတာဆိုတော့ ပိုပြီး သတိထားမိသွားတယ်... နောက်မှ ကျမတို့ အုပ်စုထဲက သူငယ်ချင်းတစ်ယောက်က သူ့ကို လှမ်းနှုတ်ဆက်မေးမြန်းစပ်စုကြည့်မှ သူ့ညီအငယ်ဆုံးလေးကို လာစောင့်နေတယ်ဆိုတာ သိလိုက်ရတယ်...

သူက အဖြူရောင် ရှပ်အင်္ကျီနဲ့ ကျောင်းစိမ်းပုဆိုးနဲ့ တော်တော်လေး လိုက်ဖက်တယ်... ကျမမြင်ဖူးသမျှ ကျောင်းသားတိုင်း သူ့လောက် သပ်ရပ်မှုမျိုး မရှိခဲ့ဖူးလို့ ထင်ပါတယ်... အဲ့ဒါကတော့ ကျမ သတိထားမိရခြင်း နောက်ထပ်အကြောင်းအရာတစ်ခု ဖြစ်မယ်ထင်ပါရဲ့... ကျမမှတ်ဉာဏ်က ရယ်တော့ရယ်ရတယ်... သူ့ဆီမှာ မဲနယ်ဆိုးတာများသွားလို့ထင်ပါရဲ့... ဖြူဖြူဖွေးဖွေးမဟုတ်ဘဲ ပြာတာတာ ရှပ်အင်္ကျီလေးတစ်ထည်ရှိတာ မှတ်မိသေးတယ်... ကချင်လွယ်အိတ်လို့ခေါ်မလားမသိတဲ့ မဲတဲတဲအိတ်လေးတစ်လုံး အမြဲလွယ်တယ်... ကျမတို့ မိန်းကလေးတွေလို ရှိရှိသမျှ ဖတ်စာအုပ် ကျူရှင်စာအုပ်တွေ တနင့်တပိုးသယ်ကြတာမဟုတ်လို့လားမသိ အရပ်သိပ်မရှည်လှပေမယ့် အသားဖြူဖြူ ကျောင်းသားတစ်ယောက် အဖြူအစိမ်းဝတ်စုံနဲ့ သားရေဖိနပ်မဲမဲလေးရယ် ကချင်လွယ်အိတ်မဲမဲလေးရယ်နဲ့ သပ်သပ်ရပ်ရပ်ရှိလှတဲ့ သူ့ကို အဲ့ဒီအချိန်တုန်းကတော့ တော်တော်ကြည့်ကောင်းခဲ့တယ်လို့ ထင်ခဲ့တယ်...

အင်း... ဘယ်လိုစိတ်ဝင်စားသွားလဲ ကျမကိုယ်တိုင်လည်း မမှတ်မိတော့ပါဘူး... သေချာတာကတော့ အထက်တန်းကျောင်းသူဘဝ နိဂုံးမချုပ်ခင် တစ်နှစ်အလိုမှာတော့ ကျမတို့တစ်တွေ အထူးသဖြင့် ဆရာဆရာမတွေရဲ့ အချစ်တော်တွေ နေတဲ့အခန်းက တော်တော်လေးကို ဗရုတ်ကျခဲ့ကြတယ်... နောက်နှစ်ဆို အထက်တန်းကျောင်းသားတွေအတွက် အရေးကြီးတဲ့အချိန်ရောက်လာတော့မှာမို့ ဆရာဆရာမတွေကလည်း လွတ်လပ်ခွင့်တွေ ပေးကြတယ်... ကျမတို့ကျောင်းသားကျောင်းသူတိုင်းကလည်း အခွင့်အရေးကို မပြတ်မကွက်ယူပြီး အတန်းထဲမှာ ဖြစ်ချင်တိုင်းဖြစ်နေခဲ့ကြတာပါရောလား... ဘယ်လောက်ဆိုးလဲဆို သဘောကောင်းတဲ့ ဆရာဆရာမတွေအချိန်ဆို တစ်တန်းလုံး တက်တက်ကြွကြွနဲ့ တိုင်ပင်စရာမလိုဘဲ အခန်းထဲကနေ တံခါးချက်တွေပိတ်ပြီး သီချင်းဆိုကြ... စော့ကြ... စကားပြောကြနဲ့ ကျောင်းဆင်းချိန်ဆို အသံများတောင် ဝင်ပါရဲ့... ဆရာဆရာမတွေ အတန်းထဲမှာ စာသင်ပြီဆိုရင်လည်း စာမသင်ဖို့ ဝိုင်းအော်ဆူပူတတ်ကြတာက ခဏခဏဆိုတော့ စာသင်ချိန်တစ်ဝက်လောက်ဆို ဆရာဆရာမတွေက စာသင်တာကို ရပ်ပေးကြပြန်ရော... ပြန်တွေးရင် အဲ့ဒီအချိန်တွေတုန်းက တစ်တန်းလုံး အုန်းအုန်းကြွက်ကြွက်ကိုဖြစ်နေကြတာ... တစ်ခါတစ်လေ မေးကြည့်ဖြေကြည့် ပဟေဠိကို မိန်းကလေးတစ်ဖက်ယောက်ျားလေးတစ်ဖက် ကစားခဲ့ကြဖူးတယ်... အဲ့ဒီလွတ်လပ်မှုတွေက စာအုပ်တွေကြား မွန်းကျပ်မှုတွေကနေ ပြင်ပစိတ်ဝင်စားစရာတွေကို ပိုပြီးဖြစ်စေခဲ့တယ်ထင်ပါရဲ့...

သူက နဂိုကတည်းက စာတော်လား... ဆုတွေရလား ကျမ မသိခဲ့ဘူး... ကျမ သတိထားမိတဲ့နောက်မှာတော့ သူက စာတော်တယ်... စာစီစာကုံးပြိုင်ပွဲတို့ ကျပန်းပြိုင်ပွဲတို့ ပဟေဠိပြိုင်ပွဲတွေမှာ ကျောင်းကိုယ်စားပြုအနေနဲ့ အမြဲလိုလို ဝင်ပြိုင်တတ်တယ်... ဆုတွေလည်း ရတတ်တယ်... မှတ်မှတ်ရရ ကျပန်းပြိုင်ပွဲတစ်ခုအတွက် သူနဲကျမတို့အတန်းထဲက နောက်ကောင်လေးတစ်ယောက်ရယ်၊ ကျမတို့နှစ်ပေမယ့် အခန်းမတူတဲ့အတန်းက ကောင်မလေးတစ်ယောက်ရယ် ဝင်ပြိုင်ကြတယ်... ကျမတို့တွေ ကိုယ့်ကျောင်းကိုယ့်အတန်းသားအချင်းချင်းအဖြစ် သူတို့ကို အရမ်းအားပေးခဲ့ကြတယ်... ပြိုင်ပွဲနီးလာတော့ အတန်းထဲမှာ ရီဟာဆယ်အနေနဲ့ အစမ်းပြောခိုင်းခဲ့တယ်... အဲ့ဒီနေ့မှာမှ ကျမသိလိုက်တာက သူ သီချင်းဆို,တာ တော်တော်ကောင်းတယ်ဆိုတာပါပဲ.. ပုံမှန်အားဖြင့် စကားပြောရင် သူ့အသံက နည်းနည်း ပြာရှပ်ရှပ်ဖြစ်နေတတ်တယ်... နောက်ဆုံးတန်းရဲ့ ရှေ့တစ်တန်းမှာ ထိုင်တဲ့ ကျမတို့ခုံတန်းနောက်မှာ အမြဲလာလာထိုင်ပြီး သီချင်းတွေ ဆိုနေတတ်ပေမယ့် အဲ့လောက် သီချင်းဆို,တတ်မှန်း ကျမ သတိမထားမိခဲ့ဖူးဘူး... နောက်ထပ်အကြောင်းအရာတစ်ခုအဖြစ် ကျမ ပိုစိတ်ဝင်စားသွားခဲ့တယ်ထင်ပါရဲ့... အဲ့ဒီမြို့နယ်အဆင့် ကျပန်းပြိုင်ပွဲက ကျမတို့ ကျောင်းမှာ လုပ်တာမဟုတ်ဘဲ တစ်ခြားကျောင်းမှာ လုပ်တာမို့ ကျမတို့တွေ သူများကျောင်းမှာ သွားအားပေးခဲ့ရတယ်... ပြိုင်ပွဲမှာ သတ်မှတ်ချိန်ထက် ပိုပြီး တော်တော်ကြာကြာ ပြောသွားလို့ သူ ဆုမရခဲ့ဘူး... ကျမတို့ကျောင်းက ကျမတို့အတန်းထဲက ကောင်လေးက ပထမရပြီး ကျမကျောင်းက ဝင်ပြိုင်တဲ့ ကောင်မလေးကတော့ တတိယရသွားခဲ့တယ်... ဆုကြေငြာတော့ ကျမနဲ့ မလှမ်းမကမ်းမှာ ရှိနေတဲ့ သူ့မျက်နှာရိပ်မျက်နှာကဲအမူအရာအားလုံးကို တွေ့နေရတယ်... အကြီးအကျယ် စိတ်ပျက်သွားတဲ့ သူ့အမူအရာ ဒါပေမယ့် ခဏလေးပါပဲ ကျမ သေသေချာချာ တွေ့လိုက်ရတယ်... နောက်တော့ ကျမလည်း အပြည့်အဝမပျော်ရွှင်ဘဲ ကျောင်းကို ပြန်လာခဲ့တယ်... နောက်နေ့ အတန်းထဲရောက်တော့ ကျတို့ကို စာသင်တဲ့ ဆရာလည်းဖြစ်၊ ဒိုင်ထဲမှာပါ,တဲ့ ဆရာတစ်ယောက်ကတော့ သတ်မှတ်ချိန်ထက် အချိန်အရမ်းကျော်ပြီး ပြောသွားခဲ့လို့ ဆုမရတာလို့ အားပေးစကားပြောရင်း ကျပန်းပြိုင်ပွဲမှာ ပြိုင်ကြသူတွေရဲ့ အားနည်းချက် အားသာချက်တွေကို ပြန်ပြောတော့ သူက ပြုံးနေခဲ့တယ်... ဒါပေမယ့် ကျောင်းကိုယ်စားပြုပြိုင်တဲ့ စာစီစာကုံးပြိုင်ပွဲတွေမှာတော့ သူ အကြိမ်ကြိမ် ဆုသွားယူတာ သတိထားမိတယ်... တီဗီမှာပြတဲ့ ပျင်းစရာကောင်းလှတဲ့ ပဟေဠိ ပြိုင်ပွဲတွေကိုလည်း တစ်ယောက်တည်း ထိုင်အားပေးနေတတ်ခဲ့ဖူးတယ်...

နောက် ကျမတို့ အဲ့ဒီနှစ်မှာပဲ ကျမတို့အတန်းက "ပြည်"သွားကြတယ်... ညအိပ်ခရီးမို့ တစ်တန်းလုံးနီးပါး သွားကြတာပေမယ့် အိမ်ကမလွှတ်လို့ မလိုက်ခဲ့ရဘူး... နောက်တစ်ကြိမ် ကျမတို့အတန်းကပဲ "ပဲခူး"သွားကြပြန်တယ်... အမြဲတမ်း မိဘကို မလွန်ဆန်နိုင်ခဲ့တဲ့ကျမ ကြောက်ကြောက်နဲ့ မိဘတွေကို သွားပူဆာခဲ့တယ်... လွယ်လွယ်ကူကူတော့ မဟုတ်ပေမယ့် အဲ့ဒီနှစ်က "ပဲခူး"ကို လိုက်ဖြစ်သွားခဲ့တယ်... ကျောင်းကနေ သွားကြတဲ့ အဲ့လိုခရီးစဉ်မျိုး တစ်ခါမှမလိုက်ခဲ့ဖူးတော့ အတန်းထဲမှာ နာမည်ကို ကြီးလို့ပေါ့... ဆရာဆရာမတွေကအစ လိုက်မယ်ဆိုတော့ အံ့တွေဩလို့... သူငယ်ချင်းတွေကလည်း ပျော်လို့... ဒါပေမယ့် အဲ့ဒီလိုလိုက်ဖြစ်ရဖို့ အကြောင်းအရင်းကိုတော့ ကျမကလွဲလို့ ဘယ်သူက အတိအကျ အသေအချာ သိနိုင်မှာလဲလေ...

ကျမက အထက်တန်းကျောင်းသူပီပီ တစ်ခြားမိန်းကလေးတွေလို လှလှပပမနေတတ်ခဲ့ဖူးဘူး... မဝတ်တတ်ခဲ့ဖူးဘူး... ပါးကွက်ကြားကြီးနဲ့ ကျောင်းမတက်ရဘူးဆိုတဲ့ ကြေငြာချက်မရှိခင်အထိ ကျမက ပါးကွက်ကြားကြီးနဲ့ ကျောင်းတက်ခဲ့တာ... ကျောလယ်ကျော်ကျော်ထိရှည်တဲ့ ဆံပင်ကို ဆံပင်အဖျားတွေ ကြမ်းလာပြီဆို ကိုယ့်ဘာသာ ရှေ့ဆွဲ ဆံပင်ညှပ်တတ်သူ... သူများတွေလို မြန်မာဝတ်စုံကို လှလှပပ မဝတ်တတ်ခဲ့ဖူးဘူး... အမေက ချုပ်ပေးတဲ့ ခါးပွပွမြန်မာဝတ်စုံတွေကို ဝါးချမ်းပြား အဝတ်ပတ်ပေးထားတဲ့ ပုံမျိုးနဲ့ ကျောင်းတက်ခဲ့တာ... ကျောင်းက,ပွဲတစ်ခုမှာ အထင်ကရအဖြစ် ပါ,ခဲ့ဖူးတာရယ် ကျောင်းကိုယ်စားပြု ပန်းပွါးအဖွဲ့ထဲပါ,တာရယ် ဆတ်ဆတ်ထိမခံဆိုတဲ့နာမည်ဆိုးလေးနဲ့ ကျော်တာရယ်ကလွဲရင် ကျောင်းက နာမည်ကြီးတဲ့ မိန်းကလေးတွေနဲ့တော့ ဘယ်ယှဉ်နိုင်ပါ့မလဲလေ.......

အဲ့ဒီနေ့က စုံညီပွဲတော်နေ့... မှတ်မှတ်ရရ ကျမတို့နှစ်မှာ ပထမဆုံး စ,ရှိလာတဲ့ ပွဲ... တိုက်ဆိုင်တာက ကျမမွေးနေ့နဲ့ တစ်ထပ်တည်းကျ,ခဲ့တယ်... အပြင်ဝတ်စုံတွေနဲ့ လှလှပပနဲ့ဆိုတော့ အားလုံးက အထူးအဆန်းတွေလိုလိုပေါ့... အဓိကက ကျောင်းတွင်း ပန်းချီလို့ပဲခေါ်မလား... အဲ့ဒီမှာ ကျမရဲ့ bio ဆရာမက ဆွဲခိုင်းလို့ ကျောင်းဖတ်စာထဲက ပုံတစ်ပုံကို စကေးကိုက်နဲ့ ပုံကြီးချဲ့ပြီး ဆွဲထားတဲ့ ကျမရဲ့ပုံကို သွားကြည့်ခဲ့တာ... ဘာတွေမှန်းမသိ ကြိတ်ကြိတ်တိုးနေတဲ့ ကျောင်းမှာ မျှော်လင့်မိသလိုပါပဲ မပြန်ခင်လေး သူနဲ့ တွေ့ဖြစ်အောင်တွေ့လိုက်သေးတယ်... အမှတ်မထင် လှေခါးအတက်အဆင်းမှာ သူဘယ်ရွှေ့ကိုယ်ဘယ်ရွှေ့ သူညာရွှေ့ကိုယ်ညာရွှေ့နဲ့ ထုတ်ဆီးတိုးသလို တိုးမိခဲ့သေးတယ်...

ကျောင်းတွေကို အရင်လိုပဲ ဟေးလားဝါးလားနဲ့ ပြန်တက်ခဲ့ကြတဲ့ တစ်နေ့မှာ... သူငယ်ချင်းတစ်ယောက်ဆီက အမှတ်မထင် သတင်းလေးတစ်ခု ကြားလိုက်မိတယ်... ဘာတဲ့... စုံညီပွဲတော်မှာပဲ သူက ကျမတို့ထက် တစ်တန်းငယ်တဲ့ ကောင်မလေးတစ်ယောက်ကို စိတ်ဝင်စားသွားတယ်ဆိုလား... နောက်တော့ "ပန်းသီး"လို့ သူ့သူငယ်ချင်းတွေ ဘာကြောင့်မှန်းမသိ နာမည်ပြောင်ခေါ်ကြတဲ့ သူ့ကို "ကလေး"လို့ နောက်ပြောင်ကြတာ ကြားလိုက်ရတယ်... စိတ်ပျက်သွားတာလား... စိတ်ကုန်သွားတာလား... မပြောတတ်ဘူး... ကျမ သူ့ကို အရင်လောက် စိတ်မဝင်စားမိအောင် ကြိုးစားဖြစ်ခဲ့တယ်... ဘာကိုလည်းမသိ မကျေမနပ်နဲ့ နာကျင်ခဲ့မိသေးတယ်... စာမေးပွဲကြီးတွေပြီးတော့ နွေရာသီကျောင်းပိတ်ရက်ကို ရောက်လာခဲ့တယ်... အဲ့ဒီနှစ်မှာ ကျမတို့ မိသားစု ပင်လယ်ဘက်ကို ခရီးထွက်ခဲ့ကြတယ်... သူ့အကြောင်းတွေ ပါ,တဲ့ ဒိုင်ယာရီလေးရယ်... သူမသိပေမယ့် ပေးဖြစ်မှာလည်းမဟုတ်တဲ့ သူ့မွေးနေ့အတွက်ဆိုပြီး ဝယ်ထားမိတဲ့ ပစ္စ္စည်းးလေးတစ်ခုရယ်... သူနဲ့သက်ဆိုင်တာတွေအားလုံးရယ်... ညမှောင်မှောင်မှာ တစ်ယောက်တည်း ကျမတို့နေတဲ့ ဘန်ဂလိုရှေ့နားလေးမှာ တွင်းလေးတူးပြီး အားလုံးမြေမြှုပ်ပစ်ခဲ့တယ်... အဲ့ဒီညက ကြယ်ကြွေတာကို ပထမဆုံး တွေ့ခဲ့လိုက်ရတယ်...

ကျောင်းတွေ ပြန်ဖွင့်လို့ ကျောင်းစ,တက်ရတဲ့ အဲ့ဒီမိုးဖွဲဖွဲနေ့မှာ....... သူက ကြည့်နေတာလား... အမှတ်တမဲ့ပဲလားတော့ မသိ... အကြည့်ချင်းဆုံတော့... ကျမ သူ့ကို ဘယ်တုန်းကမှ မသိခဲ့ဖူးတဲ့ လူတစ်ယောက်လို ကြည့်ပြီး အကြည့်လွှဲပြီး ကျောခိုင်းပစ်ခဲ့ဖူးတယ်... နောက်တော့ အတတ်နိုင်ဆုံး သူ့ကို စိတ်မဝင်စားမိအောင်လည်း ကြိုးစားခဲ့တယ်... အထက်တန်းကျောင်းရဲ့ နောက်ဆုံးကျောင်းသားကျောင်းသူတွေအနေနဲ့ ကျောင်းတက်ရက်တော့ တော်တော်နည်းခဲ့တယ်... ဒါပေမယ့် ကျမ ကျောင်းတက်ရက်တိုင်း တိုက်ဆိုင်စွာ သူလည်း ကျောင်းမှာ အမြဲရှိနေခဲ့တယ်... တစ်ခါတစ်လေတော့ စိတ်လွတ်ပြီး အရင်လို သူ့ကို ပြန်ငေးကြည့်ဖူးတယ်... ဒီနှစ်က နောက်ဆုံးဆိုတဲ့ အသိကြောင့်ထင်ပါရဲ့... တစ်ခါတစ်လေ ထောင့်စွန်းမှာ ထိုင်တဲ့ ကျမသူငယ်ချင်းမလာရင် ကျမက ထောင့်အစွန်မှာ အမြဲထိုင်ဖြစ်တယ်... အဲ့ဒီအခါတွေကျရင် ကျမစိတ်ထင်ပဲလားတော့မသိ သူက တစ်ဖက်ခုံတန်းထောင့်မှာ သူ့နေရာမဟုတ်ဘဲ လာလာထိုင်တတ်တယ်...

ကျမတို့ရဲ့အတန်းပိုင်က ကျမအဖေကို သိပ်ချစ်တဲ့ ဆရာမဖြစ်သလို သူ့အဖေကိုလည်း ကောင်းကောင်းသိနေပြန်တော့... ကျောင်းပျက်ရက်များတဲ့ ကျမတို့ကျောင်းသားတွေကို ဆူရင် သူနဲ့ကျမ နာမည်တပ်ပြီး အဆူခံရတာ အများဆုံးလည်း ဖြစ်တတ်တော့ တစ်ခါတစ်လေ မရည်ရွယ်ပါဘဲ တစ်ယောက်နဲ့တစ်ယောက် အပြန်အလှန် ရယ်ပြတာမျိုး ကြည့်ဖြစ်ကြတာမျိုးတွေ ရှိကြပြန်တယ်...

နောက်ဆုံးလို့ ကျမတွေးခဲ့မိလို့ထင်ပါရဲ့... ကျမ မိဘတွေကို အရွဲ့တိုက်ပြီး စာမလုပ်ခဲ့တဲ့ အဲ့ဒီနှစ်မှာ သူငယ်ချင်းတွေ ဂုဏ်ထူးတွေ တသီကြီးထွက်ပေမယ့် ကျမ ဂုဏ်ထူးတစ်ဘာသာပဲ ထွက်ခဲ့တော့... ဂုဏ်ထူးဘယ်နှစ်ခုထွက်လဲလို့ အားရဝမ်းသာနဲ့ မေးတတ်ကြတဲ့ ကျမဆရာဆရာမတွေရှိတဲ့ ကျမရဲ့ အမှတ်တရပေါင်းများစွာကြွင်းကျန်ရာ ကျမတို့ရဲ့ကျောင်းတော်မဟာ... ဂုဏ်ထူးတွေ အများကြီးနဲ့ ဆေးကျောင်းဝင်သွားကြတဲ့ သူငယ်ချင်းတွေရှိရာ အရပ်... ကျမ မကျင်လည်ခဲ့တာ နှစ်တော်တော်ကြာခဲ့တယ်...

အဲ့ဒီကစ,လို့ လူတစ်ယောက်ကို ငေးကြည့်ခဲ့ဖူးတဲ့ ခံစားမှုမျိုးကို တစ်ယောက်တည်း ပျင်းပျင်းရှိတိုင်း တိုက်ဆိုင်မှုတွေရှိတိုင်း ပတ်ဝန်းကျင်တိတ်ဆိတ်ပြီး စာရေးချင်စိတ်ပေါ်လာတိုင်း အမှတ်တရနဲ့ တမ်းတခဲ့မိဖူးတာတော့ အမှန်ပါပဲ....

အဲ့လိုနဲ့ ဘဝမှာ အပြောင်းအလဲများစွာကြုံလာခဲ့ပြီး သူ့ကိုလည်း မေ့ဖြစ်တဲ့ နေ့တွေ လတွေ များလာခဲ့တာ အတတ်ပညာတွေ ဆည်းပူးရာ တက္ကသိုလ်နောက်ဆုံးနှစ်ကို ရောက်လာခဲ့တော့တယ်... ခင်မင်ခဲ့တဲ့ သူငယ်ချင်းတွေကို အော်တိုရေးခိုင်းတော့ ရွှတ်နောက်နောက် ပြောင်ချော်ချော် အမြဲနေတတ်တဲ့ သူငယ်ချင်းယောက်ျားလေး တစ်ယောက်က ဒီလိုလေး အမှတ်တရရေးပေးခဲ့ဖူးတယ်...
"ပန်းသီးတွေမြင်တိုင်း နင့်ကို သတိရနေမယ်..." တဲ့...
အဲ့ဒီစာလေးတစ်ကြောင်းက ကျမမေ့နေတာကြာခဲ့ပြီဖြစ်တဲ့ လူတစ်ယောက်ကို ပိုအမှတ်ရစေခဲ့တယ်...
ကျမကို သူငယ်ချင်းတိုင်း အမှတ်ရစေတဲ့ အချက်တစ်ချက်က... ကျမအရမ်းရယ်လိုက်ရင်ဖြစ်ဖြစ် ရှက်သွားရင်ဖြစ်ဖြစ် နေပူပူထဲ သွားရင်ဖြစ်ဖြစ် ကျမမျက်နှာက နီရဲလွယ်လွန်းတယ်... သူငယ်ချင်းတော်တော်များများကလည်း အော်တိုရေးပေးတော့ ဒါကိုပဲ အမှတ်တရလုပ်ပြီး ရေးနေကြတော့တယ်... ကျမကိုယ်ကျမ မကြိုက်ဆုံးအချက်တစ်ချက်လို့ သူငယ်ချင်းတွေကို တရားဝင်ထုတ်ပြောတဲ့နေ့ကတော့ သူတို့အားလုံး တစ်သံတည်းပါပဲ... နင့်မှာ ဘယ်သူနဲ့မှ မတူတာရှိနေတာကိုက အမှတ်ရစရာ သတိရစရာပဲပေါ့တဲ့လေ...

ဆယ်စုနှစ်တစ်ခုကိုလည်း ကျော်ခဲ့ပြီ...
ဘဝတစ်ဆစ်ချိုးဆိုတာလည်း အကြိမ်ကြိမ်ကြုံခဲ့ပြီ...
ဒါပေမယ့် အဲ့ဒီအချိန်အဲ့ဒီအခါကလို အလိုလောဘမရှိခဲ့ဘဲ ငေးကြည့်ရုံသက်သက်ဆိုတဲ့ ခံစားချက်မျိုး... မာကျောပြတ်သားဖို့ ကြိုးစားမှုမျိုး... တစ်ခါတစ်လေတော့ နာကျင်မှုမျိုးမပါဘဲ ပြန်တမ်းတမိတယ်...

Created By: k2tmaung (22 January 2011 Saturday 01:22AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...

Happy Birthday...

ဒီည ဖုန်းမဆက်တော့ဘူးလို့တော့ ပြောထားသား...

ဒါပေမယ့် ကျမမွေးနေ့ဆိုတော့ "စိတ်လေးများ ပြောင်းပြီးတော့..." ဆိုတဲ့ မျှော်လင့်ချက်လေးကတစ်ဖက် မဆက်လည်းနေပေါ့ဆိုတဲ့ အရွဲ့တိုက်ချင်တဲ့စိတ်လေးကတစ်ဖက်... နောက်ဆုံးတော့ အိပ်ယာစောစောမဝင်တတ်တဲ့ ကျမ စောစောစီးစီး အိပ်ယာထဲ သွားလှဲနေလိုက်တော့တယ်...

အိမ်ရှေ့ခန်းက ဖုန်းသံကြားလိုက်တော့ ပထမဆုံး နိုးလာသူက ကျမ... အဖေနဲ့အမေကြားမှာ အိပ်နေတဲ့ကျမ မိဘတွေ မနိုးအောင် အညင်သာဆုံး ကုတင်ပေါ်ကဆင်းဖို့ ကြိုးစားပေမယ့် ကျမလှုပ်ရှားမှုတွေ သိပ်မြန်ဆန်လွန်းသွားလို့ ထင်ပါရဲ့... မိဘတွေ နိုးသွားကြတယ်... နိုးသွားပြီဆိုတော့ မထူးတော့ပါဘူးဆိုပြီး ဟန်မဆောင်နိုင်ဘဲ အိမ်ရှေ့ခန်းကို အပြေးတပိုင်း ပြေးထွက်လာခဲ့တော့ နောက်ဘက်မှာ မိဘနှစ်ပါးရဲ့ ဒီအချိန်ကြီး ဘယ်ကဖုန်းလာတာလဲ... ဘာလဲ ညာလဲနဲ့... စကားသံတွေ ကျန်ခဲ့လေရဲ့...


ကျမ အိပ်ရှေ့ခန်းကိုရောက်တော့ အိမ်ရှေ့ခန်းနဲ့ အနီးဆုံးမှာ အိပ်တဲ့ မောင်လေးက ဖုန်းကိုင်ပြီး ဖြစ်နေပြီ... ကျမဖုန်းပဲဆိုတာ အတတ်သိနေတဲ့ ကျမက မျှော်လင့်ချက်လေးပိုက်လို့ ဘေးမှာ အသာရပ်နေလိုက်တယ်... မောင်လေးဖုန်းထိုးပေးတော့... ဖုန်းထဲက အသံကို ကြားလိုက်ရချိန် ရင်ဘတ်ထဲမှာ ဖန်ခွက်တစ်လုံး ကျကွဲသွားတယ်ထင်ပါရဲ့... ကြမ်းပြင်မှာပဲ ထိုင်ချလိုက်ပြီး ဖုန်းလက်ခံပြောရင်း လူက အလိုလို ပြန်အိပ်ချင်သွားပြန်တာ တော်တော်ထူးဆန်းပါရဲ့... အင်းလေ... သူက ဖုန်းမဆက်ဘူးလို့ ပြောထားသားပဲ... မျှော်လင့်မိတဲ့ ကျမသာ အပြစ်ရှိ လူသားပေါ့...

ဖုန်းချပြီးတော့ ခပ်တွေတွေနဲ့ အိပ်ခန်းဘက် လမ်းပြန်လျှောက်လာခဲ့တယ်... မှေးကနဲလို့ ထင်လိုက်ပေမယ့် ကျမ အိပ်ပျော်သွားတာ တော်တော်တောင် ကြာသွားပါရောလား... အပြင်ဘက်မှာ အမှောင်ဆုံးအချိန်ကိုရောက်လို့ ကျမမွေးနေ့လေးကို တဖြည်းဖြည်း ချည်းနှင်းလို့ဝင်ရောက်လာနေပြီလေ... အိပ်ယာပေါ် ပြန်ရောက်တော့ မိဘတွေက ဘယ်သူလဲ ဒီအချိန်ကြီး ဘာညာနဲ့ မေးခွန်းတွေ ထုတ်နေပေမယ့် စကားလုံးတွေက ရင်ဘတ်ထဲကနေ တက်မလာတော့...

ဒီနေ့ ကျမမွေးနေ့... နေ့ကောရက်ကော တိုက်တဲ့ ထူးခြားတဲ့မွေးနေ့လေးတစ်နေ့ပေါ့... အရင်ငယ်ငယ်တုန်းကတော့ မွေးနေ့ရောက်တော့မယ်ဆိုရင် အဝတ်အစားအသစ် ဖိနပ်အသစ်နဲ့ ကျမမွေးနေ့ဆိုတဲ့ အသိလေးနဲ့ ပျော်ရွှင်တက်ကြွပြီး ပျော်အောင်နေဖို့ အမြဲကြိုးစားတတ်တယ်... တစ်ခုခု စိတ်အနှောက်အယှက်ဖြစ်စရာနဲ့ ကြုံခဲ့ရင်လည်း ကျမ သိပ်စိတ်ဆိုးတတ်တယ်... ဘာလို့ဆို ကျမက ကျမမွေးနေ့ကိုသာ ဘဝရဲ့ တန်ဖိုးအထားဆုံးနေ့ရက်ကလေးအဖြစ် သတ်မှတ်ထားလို့ပါပဲ... ခုတော့ အသက်ကြီးလာလို့ ထင်ပါရဲ့... နှစ်စဉ်နှစ်တိုင်း တစ်ခုမဟုတ်တစ်ခု လုပ်လေ့လုပ်ထရှိတဲ့ ကျမကို မိဘတွေက မွေးနေ့မရောက်ခင်ကတည်းက ဘာလုပ်ချင်လဲလို့ မေးခဲ့ပေမယ့် ဘာမှထူးထူးခြားခြား လုပ်ချင်စိတ်မရှိ... အကြီးဆုံးသမီးမို့ပဲလား၊ မွေးနေ့ပြီးနောက်တစ်ရက်က အများပြည်သူရုံးပိတ်ရက်ဖြစ်လို့ပဲလားတော့မသိ မောင်နှမတွေထဲမှာ နှစ်တိုင်းလိုလို မွေးနေ့အတွက် တစ်ခုခုလုပ်ဖြစ်တတ်တာ၊ လုပ်ရမှလည်း ကျေနပ်တတ်တဲ့ ကျမကို ကျမမိဘတွေက အမြဲ အလိုလိုက်တတ်ကြတယ်... ဒီနှစ်တော့ ကျမမွေးနေ့အတွက် အရင်လို တက်တက်ကြွကြွမရှိလို့ထင်ပါရဲ့... မိဘတွေက မွေးနေ့မှာ ဝတ်ဖို့ အင်္ကျီသစ်လေး နှစ်ထည် အတင်းလိုက်ဝယ်ပေးခဲ့တယ်...

မွေးနေ့မှာ စိတ်ထဲ လုပ်ချင်တာ တစ်ခုပဲ ရှိခဲ့တယ်... အဲ့ဒါကတော့ ဘုရားသွားချင်တာ... အိပ်ယာကနိုးနိုးချင်း မောင်လေးကို အတင်းသွားနှိုးလိုက်တယ်... သူကတော့ တစ်နေ့က ဆေးရုံးမှာ ညဘက် ဟောက်စ်ဆင်းထားရလို့ မနေ့ညနေကတည်းကနေ ဒီနေ့မနက်ထိ အိပ်ကောင်းတုန်းပေါ့... အားလုံးပြင်ဆင်ပြီးတော့ အိမ်ကမထွက်ခင် အဖွား၊ မိဘနဲ့ အလည်ရောက်နေတဲ့ အဒေါ်ကို ဦးဆုံး ကန်တော့လိုက်တော့ မွေးနေ့အတွက် မင်္ဂလာရှိသော ဆုတောင်းစကားတွေကို ပထမဆုံး ရလိုက်တဲ့အခါ ဝမ်းသာမှုတွေ ဖြစ်ထွန်းရတယ်... အဖွားက ခဏနေတော့ စက္ကူအနီလေးနဲ့ ထုပ်ထားတဲ့ အမ်ပေါင်းလေး လက်ထဲလာထိုးထည့်ပေးတယ်... ကျမပြုံးလိုက်မိတယ်... ဒါ မွေးနေ့မှာ ပထမဆုံးရတဲ့ လက်ဆောင်ပါလားလို့ပေါ့...

နှစ်တိုင်းလိုလိုကတော့ ပထမဆုံး မွေးနေ့လက်ဆောင်အဖြစ် ညီမလေးဆီက တစ်ခုခုရနေကျ... ဒီနှစ်လည်း မနှစ်ကလို မွေးနေ့မှာ ညီမလေးက အဝေးမှာ...

ဘုရားမသွားခင် Lucky Seven မှာ မနက်စာဝင်စားလိုက်သေးတယ်... နောက်တော့ ဘုရားသွား... ရေသပ္ပါယ် လက်ယာရစ် သုံးပတ်ပတ်ပြီး ဆင်းခါနီး ဓာတ်ပုံလေးဘာလေးရိုက်လိုက်သေးတယ်... နောက် ဇီဝိတဒါနသံဃာ့ဆေးရုံကြီးမှာ သွားလှူဖြစ်တယ်... နေ့လည်ရောက်တော့ ပျင်းပျင်းရှိတာနဲ့ ဒီအတိုင်းကြီး မပြီးဆုံးလိုက်ချင်တာနဲ့ အရင်ရုံးမှာတုန်းက အလုပ်အတူလုပ်ခဲ့တဲ့ အစ်မတစ်ယောက်ဆီ နေပူရှိန်မသေးချိန် ထီးလေးစောင်းပြီး တစ်ယောက်တည်း လျှောက်လာခဲ့တယ်... မရောက်တာ တစ်နှစ်ကျော်ကြာပြီဖြစ်တဲ့ သွားနေကျဖြစ်ခဲ့ဖူးတဲ့ လမ်းတွေက တစ်ချို့နေရာမှာ အပြောင်းအလဲတွေ ဖြစ်လို့နေပါလား... သူငယ်ချင်းအိမ်ရောက်တော့ ခေါင်းလောင်းကြိုးမမှတ်မိတာနဲ့ အောက်ထပ်ကနေပဲ ဖုန်းလှမ်းဆက်ရင်း ရပ်စောင့်နေလိုက်တော့တယ်...

အဲ့ဒီအချိန်မှာ တစ်ချိန်လုံး မျှော်လင့်နေခဲ့တဲ့ ဖုန်းက မြည်လာခဲ့တော့တယ်... တကယ်တော့ Birthday Wish လုပ်တာမျိုးဖြစ်ဖြစ် မွေးနေ့လက်ဆောင်ပေးတာမျိုးပဲဖြစ်ဖြစ် တစ်ခုခုမှာ သူ့ကို ဦးဆုံးဖြစ်နေစေချင်ခဲ့ပေမယ့်....... အရမ်းမျှော်လင့်ခဲ့လို့ထင်ပါရဲ့... ဖုန်းသံကြားရချိန်မှာ ကျမအတွက် ရင်ထဲမှာ ဟာလာဟင်းလင်းဖြစ်နေခဲ့တယ်... ခဏလေးပါပဲ... ဖုန်းအချပြီး နည်းနည်းကြာမှ သူငယ်ချင်းက အောက်ထက်ရောက်လာခဲ့တယ်... သူဝယ်ကျွေးတဲ့ ပဲကြာဇံသုပ်ဆိုတာကို စားပြီး ကျမတို့အကြောင်းသိတဲ့ လူအနည်းစုထဲက တစ်ယောက်မို့ ရင်ဖွင့်ခွင့်မရတာကြာတော့ ပြောပြချင်တာတစ်ချို့ ပြောပြရင်း ပြောရတာကို အားမရှိသလို ခံစားလာရပြန်တယ်...

နောက်တော့ အင်တာနက် ခဏသွားသုံးရင်း သူနဲ့ စကားခဏပြောဖြစ်လိုက်တယ်... Facebook ပေါ်က မွေးနေ့ဆုတောင်းလေးတွေ လိုက်ဖတ် reply လေးတွေ ပြန်ရင်း... သူငယ်ချင်းကိုလည်း သူသိချင်တာတွေ ပြောပြရင်း အချိန်က ကုန်မှန်းမသိ ကုန်လာခဲ့တယ်... ထွက်လာတာ ကြာပြီမို့ အိမ်ကလည်း ဖုန်းဆက်ခေါ်တော့တယ်... မှောင်လာတဲ့အချိန်မို့ ကျမဖခင်ကိုပဲ လာကြိုခိုင်းလိုက်တော့တယ်... ပြီးခဲ့တဲ့နှစ်ကလည်း ဒီလို မှောင်လာတဲ့အချိန်မှာ ကျမမိဘတွေ ဖုန်းဆက်ခေါ်ခဲ့ဖူးတယ်... ဒါပေမယ့် ခုလို စောစောစီးစီးတော့ ကျမ အိမ်မပြန်ဖြစ်ခဲ့ပါဘူး... လမ်းလျှောက်ပြီး လမ်းမှာ ပထမဆုံးအကြိမ် ဝက်သားထုတ်ထိုးတောင် ဝယ်စားလိုက်သေးတယ်... နောက်ကျမှ Taxi နဲ့ ပြန်လာတဲ့ ကျမကို ကျမဖခင်က ဝရံတာမှာ ထွက်မျှော်နေခဲ့တယ်... သူနဲ့ သွားမှန်းသိပေမယ့် ကျမမွေးနေ့မို့ထင်ပါရဲ့... ကျမပေးတဲ့ အစီအစဉ်မကျတဲ့ ဆင်ခြေတွေကို ထပ်ပြီး မမေးခဲ့တော့ဘူးလေ...

ညမိုးချုပ်လာလေ... မွေးနေ့က ဘာမှလည်း အဓိပ္ပာယ်မရှိဘူးလို့ ခံစားလာရရင်း ဝမ်းနည်းမိသလိုလို... နောက်တော့ မိသားစုတွေ အမှတ်တရဓာတ်ပုံသွားရိုက်ရင်း အဝေးရောက်နေတဲ့ ညီမလေးဆီ ဖုန်းဆက်ပြီး ချက်ချင်းခေါ်မရတော့ internet ခဏသုံးဖြစ်ပြန်တယ်... နောက် ညီမလေးကို ဖုန်းခေါ်ရတော့ မနက်ကဘုရားသွားတာ အလှူလုပ်တာတွေ ပြောပြဖြစ်တယ်... ခဏနေတော့ အိမ်ပြန်လာခဲ့တယ်... စောစောပဲ အိပ်ယာဝင်ဖို့ ကြိုးစားရင်း ကျမမိခင်ကို "ဒီနှစ် ဘာမွေးနေ့လက်ဆောင်မှလည်း မရဘူးနော်"လို့ ပြောလိုက်တော့ "အင်္ကျီအသစ်ဝယ်ပေးတယ်လေ..."လို့ ပြန်ပြောခဲ့တယ်... ဟုတ်တော့လည်း ဟုတ်သား... ဒါပေမယ့် ကျမကလည်း မွေးနေ့မှာ ပါကင်လေးနဲ့ ရတဲ့ လက်ဆောင်ကိုမှ ဘာလေးလဲလို့ ရင်ခုန်ကြည်နူးရတဲ့ လက်ဆောင်မျိုးကိုမှ မွေးနေ့လက်ဆောင်အဖြစ် သတ်မှတ်တတ်တာ အကျင့်တစ်ခုလို ဖြစ်နေတာပါလားဆိုတာ ကိုယ့်ကိုယ်ကိုယ် ပြန်သုံးသပ်ဖြစ်တယ်...

ဒီနှစ်တော့ ထူးထူးခြားခြား မွေးနေ့မှာ ထူးထူးခြားခြား ဘာမှမလုပ်ဘဲ ထူးထူးခြားခြား အိပ်ယာစောစောဝင်ခဲ့တယ်...

Created By: k2tmaung (12 January 2011 Wednesday 05:27AM)

ဆက်လက်ဖတ်ရှုရန်...

ကျေးဇူးတင်ပါတယ်ရှင်...