လမ်းချိုးတစ်ခုရဲ့ မှတ်တမ်း

အတိတ်ဆိုတာ အိပ်မက်ပဲ...
ပစ္စုပ္ပန်နဲ့ မဆက်စပ်သလို...
အနာဂတ်နဲ့လည်း မယှက်နွယ်ဘူး...
အိပ်မက်ဆိုတာ နိုးထပြီးရင်...
တိုးလျစွာ ပျောက်ကွယ်သွားတယ်...
ဘာပဲဖြစ်ဖြစ် လူတွေအားလုံး...
ပစ္ခုပ္ပန်မှာပဲ ရှင်သန်ကြတယ်...
အနာဂတ်အတွက် စိတ်ကူးတွေ ယဉ်ကြတယ်...
ငါလည်းလေ လောကီသားပေပဲမို့...
အတိတ်မှာ အိပ်မက်မက်ခဲ့ဖူးတယ်...

တစ်ချိန်က ငါ့ နားထဲ...
ပျားသကာလို ချိုခဲ့ဖူးတဲ့ စကားတစ်ခွန်း...
ဘာတဲ့...
တို့ နှစ်ယောက်ကြား secret တွေ မထားဘူးဆိုလား...
ခုတော့လည်း privacy ဆိုတဲ့ စကားလုံးနဲ့ စည်းခြား...
personal ဆိုတဲ့ အကြောင်းပြချက်နဲ့...
နယ်နိမိတ်တွေ မျဉ်းသားလို့ပါလား..
ငါ ဇွတ်တရွတ်ဆိုးတတ်တာ မွေးရာပါလို ဖြစ်နေပေမယ့်...
သတိပေးခံရလောက်အောင်တော့...
ငါ့ ဦးနှောက်က ခြမစားသေးပါဘူး...

ငါက စကားပြေတွေလှဖို့...
တစ်ခါတစ်ခါတော့ မုသားတွေထားတယ်...
ဒါပေမယ့်...
လူအများအကြား ငါသာ အမှန်တရားလို့တော့...
နားကြားပြင်းကတ်အောင် စကားမတတ်ခဲ့ဘူး...
ငါသဘောကျတဲ့ အလိမ်အညာကင်းတဲ့သူ...
အထိမ်အချန်လေးနဲ့ ခံစစ်တွေဆောက်တတ်မှန်း...
နောက်ကျမှ သိလိုက်ရတော့...
ငါ့အဖြူရောင်တွေ ငါကိုယ်တိုင် ဆေးဆိုးမိတဲ့အတွက်...
ခပ်ပြုံးပြုံးပဲ နောင်တရလိုက်တယ်...
မာနလေးတွေ မပွန်းပဲ့သရွေ့...
ငါ့ အိပ်မက်ထဲမှာ ငါ နစ်မွန်းကောင်းခဲ့လွန်းလို့ပေါ့...

နောက်ဆုံးတော့လည်း...
ငါသာ အသိုင်းအဝိုင်းကြားမှာ နားလည်မှုကင်းတဲ့...
သတင်းလွေလွေနဲ့ ဂျာရစ်တစ်ယောက်...
ဖြစ်မှန်းမသိ ဖြစ်လို့ပါလား...

တာလွန်နေမှ ငါ ထိုးကွင်းထ,မနေတော့ပါဘူး...
ပြဿနာ ဘယ်ကစ,လဲလည်း မီးခွက်ထွန်းမနေတော့ပါဘူး...
လက်ခုပ်ဆိုတာ နှစ်ဖက်တီးမှ မြည်မှန်း...
ငါ တီတီတာတာ ရှင်းပြဖို့လည်း စိတ်မဝင်စားတော့ပါဘူး...

တစ်ခုပါပဲ...
ငါ့ဘဝနဲ့ရင်းပြီး ငါမိုက်မဲခဲ့ဖူးတယ်...
ပြစ်ချက်တွေ မစဲနိုင်အောင် မှားခဲ့ဖူးတယ်...
အဲ့ဒီဆူးတွေအားလုံးအတွက်လည်း...
ငါ တစ်ယောက်ပဲ "ဖက်"ဖြစ်ခဲ့ဖူးတယ်...
ငါ့လုပ်ရပ်တွေက ငါ့ဘဝအတွက်...
ဇာတ်ပို့ကောင်း ဖြစ်နေပေမယ့်...
အကယ်ဒမီ မရချင်နေ...
ဘယ်သူဇာတ်နာအောင်မှ ငါ ဗီလိန်မလုပ်ဘူး...
ငါ့ ဘာသာ၊ ငါ့ ပညာ၊ ငါ သိက္ခာ...
ငါ့ အရည်အချင်း နဲ့ ငါ့ အဆင့်အတန်း...
ပန်းဝင်လောက်အောင် တော်မနေပေမယ့်...
သူများချော်လဲအောင် ငါ ခြေထိုးမခံဘူး...
နောက်ကွယ်မှာ ငါသာ သက်ဆိုင်သူလို့...
မဏ္ဍပ်တိုင် တက်မပြဘူး...
မယုံချင်နေ ငါ ပုံပြောမကောင်းတာ...
ငါ့ကို ရင်းနှီးသူတွေ ယုံပေးလိမ့်မယ်...

မွန်းကျပ်မှုတွေကြားမှာ ခါးသီးမှုတွေများပေမယ့်...
ရှုမငြီးတဲ့ သင်ခန်းစာတွေအလယ်...
ခုတော့ မယောင်မလည်နဲ့ပေါ့...
ဒါပေမယ့် တစ်နေ့နေ့မှာ...
စာတမ်းတစ်စောင်တော့ ငါ ပြုစုလာနိုင်မှာပါ...

ဘဝဆိုတာ ဖောင်ဖျက်ထားတဲ့ တိုက်ပွဲပေမယ့်...
ကိုယ်တိုင် ဖန်တီးတဲ့ ကျိန်စာတွေထဲ...
ငါ့ကိုယ်ငါ ပစ်စလက်ခတ် အလံဖြူ မတပ်လိုက်ချင်ဘူး...
အတိတ်က အတိတ်ပါပဲ...
ပစ္စုပ္ပန် နဲ့ အနာဂတ်ကို နမိတ်မဖတ်တတ်မှန်း...
သတိမချပ်မိလိုက်တဲ့ ငါသာ အမှားပေါ့...

သွားပါလေ အိပ်မက်တွေရေ...
ခပ်ဝေးဝေးကို လွင့်သွားစမ်းပါ...
ငါ ခွင့်ပြုချက်မရဘဲ ဝင်လာခဲ့ပြီး...
ခပ်ရင့်ရင့်နဲ့ ငါ့ကို အမိန့်တွေ လာမပေးစမ်းပါနဲ့...
အိပ်မက်ဆိုတာ မက်တုန်းခဏသာ ချိုတာ...
ငါ ငိုရတာ များမှ အဲ့ဒီအထာတွေ သိလာရတယ်...

ငါ တက်ရတဲ့ ဘဝတောင်တွေ မက်စောက်တာများတော့...
ကြောက်ကြောက်နဲ့ ခိုဝင်နားလိုက်မိတာ...
ငါ့ ညတွေကို အတာစားတဲ့ တောနက်နက်ကြီး ဖြစ်နေပါပေါ့လား...
ညတာတွေ ရှည်ခဲ့လို့ နေ့ဘက်မှာ ငါ အိပ်ဆေးတွေ သောက်နေရတယ်...
ဆေးတန်ခိုးနဲ့ အိပ်ချင်ယောင်ဆောင်နေတဲ့ ငါ့ကိုယ်ငါ...
နိုးအောင် ကြိုးစားပမ်းစား နှိုးနေရတယ်...
ဝါး... လောကကြီးရဲ့ မနက်ခင်း လင်းခြင်းနေပေမယ့်...
ငါ့မျက်လုံးတွေ မှေးစင်းဆဲ...
ကျေးငှက်လေးတွေ တေးဆိုနေပေမယ့်...
အိပ်ရေးမဝသေးတဲ့ ငါ... ကြားရတာ နားခါးတယ်...

ခံယူချက်တွေ ဖြောင့်စင်းနေတဲ့...
မျဉ်းပြိုင်နှစ်ကြောင်းပေါ်က...
လမ်းလျှောက်နေတဲ့ လူနှစ်ယောက်...
တစ်သက်တာ လက်တွဲဖို့ဆိုတာ...
အနာဂတ်ကို ဟားတိုက်နေသလိုပါပဲလား...

တံခါးတစ်ချပ်ကို ဆွဲဖွင့်ပြီးမှတော့...
ဆန္ဒတွေ မြိုသိပ် မာနရိုင်းတွေ ခေါင်းအုံးအိပ်ပြီး...
နောက်ထပ်အမှားတွေ ငါ့ဘဝထဲ ဖိတ်ခေါ်မိနေတယ်ဆိုလည်း...
ဘဝက နေပျော်ပျော် သေပျော်ပျော် ဖြစ်ဖို့ပဲ လိုတာပါ...။

Blog မှာ Post (၁၀၀) ပြည့်အမှတ်တရ...
personal ကဗျာတစ်ပုဒ်ကြောင့် Blog လေးတစ်ခုဖြစ်လာတာမို့ ရေးလက်စ ကဗျာကိုပဲ လက်စသတ်လိုက်တာပါ... :)
Created By: k2tmaung (20 June 2010 Sunday 06:21AM)